Donald Tramp Qasym-Jomart Toqaevty Maıamıde ótetin G20 sammıtine shaqyrdy

ASTANA. KAZINFORM — AQSh Prezıdenti Donald Tramp Qazaqstan Prezıdenti Qasym-Jomart Toqaevpen telefon arqyly mazmundy áńgime órbitkenin málimdedi. Bul týraly Aq úı basshysy óziniń Truth Social áleýmettik jelisindegi paraqshasynda jazdy.

Tramptyń aıtýynsha, áńgime barysynda taraptar qazirgi qaqtyǵystardy retteýdiń mańyzyn, sondaı-aq elder arasyndaǵy saýda men yntymaqtastyqty keńeıtý máselelerin talqylaǵan.

Sonymen qatar AQSh Prezıdenti Qasym-Jomart Toqaevty kelesi jyly Maıamı qalasynda ótetin G20 sammıtine qatysýǵa shaqyrý nıetin bildirdi.

Buǵan deıin Qasym-Jomart Toqaev AQSh Prezıdenti Donald Tramppen telefon arqyly sóıleskeni habarlandy. Memleket basshysy Amerıka prezıdentin ózine qolaıly ýaqytta Qazaqstanǵa saparmen kelýge shaqyrdy. Bul ekijaqty qarym-qatynastaǵy tarıhı ýaqıǵa bolatynyna senim bildirdi.

Sonymen qatar AQSh prezıdenti Qasym-Jomart Toqaevqa jyly lebizin bildirip, Memleket basshysyna syı-syıapat joldaǵany belgili boldy.