Donald Tramp Kanadamen saýda kelissózderin toqtatyp, tarıfti 10%-ǵa kóterdi

ASTANA. KAZINFORM — AQSh prezıdenti Donald Tramp Kanadaǵa salynatyn tarıfterdi taǵy 10%-ǵa kótergenin málimdedi. Onyń aıtýynsha, mundaı sheshim Kanadada túsirilgen Aq úı basshysynyń saıasatyn synaǵan jarnamalyq beınerolıkke baılanysty qabyldanǵan. Bul týraly BBC jazdy.

BBC habarlaýynsha, bul rolıkti Ontarıo provıntsııasynyń premeri Dag Fordtyń tapsyrmasymen ázirlegen. Ol tikeleı ári ótkir málimdemelerimen tanymal saıasatker retinde belgili. Rolıkte AQSh-tyń burynǵy prezıdenti Ronald Reıgannyń sózi qoldanylady, onda Reıgan tarıfterdiń saýda soǵystary men ekonomıkalyq apattarǵa ákeletinin aıtqan.

Osydan keıin Tramp Kanadamen saýda kelissózderin toqtatyp, Ontarıo bıligin jalǵan aqparat taratty dep aıyptady.

Juma kúni Ford óziniń provıntsııasynyń AQSh-taǵy antıtarıftik jarnamalyq naýqanyn ýaqytsha toqtatatynyn málimdedi. AQSh-tyń kanadalyq taýarlarǵa engizgen tarıfteriniń eń qatal synshylarynyń biri sanalatyn Ford bul sheshimdi Kanada premer-mınıstri Mark Karnımen sóıleskennen keıin qabyldaǵanyn aıtty. Ol telearnadaǵy jarnamanyń dúısenbi kúni toqtatylatynyn jáne «saýda kelissózderi qaıta bastalýy úshin» osylaı jasalatynyn atap ótti.

Alaıda senbi kúni Tramp óziniń Truth Social áleýmettik jelisinde jańa jazba jarııalap, atalǵan rolıkti «aldaý» dep atady.

— Olardyń faktilerdi óreskel burmalaýy men jaýlyq áreketterine baılanysty Kanadaǵa salynatyn tarıfti taǵy 10%-ǵa kóteremin, — dedi jazbasynda.

Buǵan deıin Kanada premeri jýrnalısterge eldiń AQSh-pen saýda kelissózderin «amerıkalyq tarap daıyn bolǵan kezde» qaıta bastaýǵa ázir ekenin aıtqan.

Eske sala keteıik, AQSh Qytaı taýarlaryna 1 qarashadan bastap 100% baj salyǵyn engizedi.