Donald Tramp Iranǵa 15 tarmaqtan turatyn beıbit jospar usyndy — BAQ
ASTANA. KAZINFORM — AQSh prezıdenti Donald Tramp Iranǵa jasalyp jatqan shabýyldardy toqtatý úshin 15 tarmaqtan turatyn jospar usynyp, sondaı-aq kelissózder júrgizý maqsatynda atysty bir aıǵa ýaqytsha toqtatý bastamasyn kóterdi, dep habarlaıdy Anadolu.
Bul týraly 12-arna aty-jóni atalmaǵan ızraıldik derekkózderge súıene otyryp habarlady.
Derekkózderdiń málimetinshe, AQSh Iranmen shıelenisti azaıtýǵa baǵyttalǵan usynys daıyndaǵan.
Habarlarǵa qaraǵanda, bul jospar Tegeran qalasyna Pákistan arqyly jetkizilgen.
Materıalda Iranǵa qarsy shabýyldardy toqtatýǵa baǵyttalǵan jospardyń yqtımal sharttary da keltirilgen.
Atap aıtqanda, josparǵa Irannyń ıadrolyq áleýetin joıý, Tegerannyń ıadrolyq qarý jasaýǵa umtylmaý mindettemesi, sondaı-aq Isfahan, Natanz jáne Fordo nysandaryndaǵy ıadrolyq obektilerdi paıdalanýdan shyǵarý sııaqty talaptar engizilgen.
Sonymen qatar, Iranǵa el ishinde ýran baıytýdy toqtatyp, 60 paıyzǵa deıin baıytylǵan ýrandy Halyqaralyq atom energııasy agenttigine (MAGATE) berý usynylǵany aıtyldy.
Aqparatqa sáıkes, sharttar qatarynda Ormýz buǵazy arqyly keme qatynasyn qalpyna keltirý, Irannyń zymyran baǵdarlamasyna qashyqtyq pen sany boıynsha shekteýler engizý, sondaı-aq Tegerannyń aımaqtaǵy «proksı-kúshterdi» qoldaýyn toqtatý talaptary da bar.
Onyń ornyna Iranǵa qarsy sanktsııalardy alyp tastaý kózdelgen.
Buǵan deıin Iranda 82 myńnan astam azamattyq nysan zardap shekkeni habarlanǵan bolatyn.
