Donald Tramp: Garvard – demokratııaǵa qaýip tóndiredi

ASTANA. KAZINFORM — AQSh-tyń burynǵy prezıdenti Donald Tramp óziniń Truth Social áleýmettik jelisinde Garvard ýnıversıteti týraly málimdeme jasady. 

Ol tanymal oqý ornyn antısemıttik jáne radıkaldy solshyl mekeme dep atady.

«Garvard – antısemıttik, radıkaldy solshyl mekeme. Bul jerge álemniń túkpir-túkpirinen eldi qurtýǵa qumar jastar qabyldanady. Bul – lıberaldy beıbereket oryn. Munda esinen adasqan, jyndy adamdar aýdıtorııaǵa kirip-shyǵyp, jalǵan ashý men jekkórinish sezimin taratady. Bul – shyn máninde sumdyq! Biz sotqa aryzdanǵannan keıin ǵana olar ózderin «naǵyz amerıkalyqtar» sekildi kórsetkisi keledi, – dep jazdy Tramp áleýmettik jelide.

Onyń aıtýynsha, Garvard ýnıversıteti – demokratııaǵa qaýip tóndiretin mekeme.

Sondaı-aq, Tramp óz advokatyna qatysty da pikir bildirdi.

- Meni qorǵap júrgen advokat birden otstavkaǵa ketýi nemese jumystan shyǵarylýy kerek. Ol onsha jaqsy emes. Meniń endi uldarym basqaratyn, óte úlken ári ádemi kompanııam odan tezirek qutylsa eken deımin! – dep qorytyndylady ol.

Eske salsaq, buǵan deıin Tramp ákimshiligi Garvardqa bólinetin 2 mlrd dollardy toqtatyp, sheteldik stýdentterdi qabyldaý quqyǵynan aıyramyz dep eskertken edi.

Keıin Garvardqa bólinetin taǵy 1 mlrd dollar qarjyny keri qaıtarý jospary bolǵan.

Osyǵan baılanysty Garvard ýnıversıteti Tramp ákimshiligin sotqa bergen.