Donald Tramp alaıaqtyq jasady dep tanyldy

Nıý-Iork sýdıasy Donald Tramp pen onyń uldaryn alaıaqtyq boıynsha kináli dep tanydy. Tramptar 10 jylǵa jýyq ýaqyt jalǵan qarjylyq esepter berip kelgen. Otbasylyq – Trump Organization kompanııasynyń bıznes sertıfıkaty toqtatylatyn boldy. QazAqparat bul týraly CNN-ge silteme jasap habarlaıdy.

Sýdıa Artýr Engoronnyń úkimi Nıý-Iork bas prokýratýrasy men AQSh-tyń burynǵy prezıdentine qatysty azamattyq istiń sotqa joldanýyna birneshe kún qalǵanda shyqty.

Engoron bas prokýrordyń so úkimin jeńildetilgen tártipte shyǵarý týraly ótinishin qanaǵattandyryp, Tramp, onyń uldary jáne basqa tulǵalardyń Nıý-Iork shtatynyń zańyn «júıeli túrde buzǵany úshin zańdy jaýapty» dep tapty.

Ol sondaı-aq Tramp otbasynyń nesıe berýshiler men saqtandyrýshylarǵa on jyl boıy bergen qarjylyq esepteriniń jalǵan ekenin anyqtap, olardyń talaı ret alaıaqtyq jasaǵanyn málim etti.

Bul sheshim qarjylyq esepterde golf alańdary, qonaqúıler, Mar-a-Lago jáne Seven- Sprıngstegi úıleriniń qunyn kótermegeni týraly Donald Tramptyń málimdemelerin tolyǵymen joqqa shyǵardy.

Bas prokýror Tramp otbasynyń 250 mln dollar kóleminde ótemaqy tóleýin, Nıý-Iorkte joǵary laýazymdy qyzmette jumys isteýine jáne kompanııaǵa bes jyl boıy kásipkerlik qyzmetke qatysýǵa tyıym salý jazasyn berýdi talap etti.

Sýdıa bul is boıynsha jaýapker Tramp kompanııalarynyń, sonyń ishinde Trump Organization-tyń bıznes sertıfıkattaryn qaıtaryp aldy jáne korporatıvtik qurylymdardy «taratý» úshin qabyldaýshy taǵaıyndalatynyn aıtty. Sotqa Nıý-Iorktegi jyljymaıtyn múliktiń eki nysany qatysty: Ýoll-strıt 40 mekenjaıyndaǵy kommertsııalyq munara jáne Tramp otbasynyń Seven-Sprıngstegi kesheni.