Donald Tramp AQSh-ta benzın qymbattaǵany úshin keshirim suraýdan bas tartty
ASTANA.KAZINFORM — AQSh prezıdenti Donald Tramp Iranǵa qarsy soǵys saldarynan elde benzın baǵasynyń ósýine baılanysty amerıkalyqtardan keshirim suraýdan bas tartty. Ol bul týraly Nasso okrýgindegi polıtsııa akademııasynda sóılegen sózinde málimdedi, dep habarlaıdy TASS.
Iranǵa qarsy soǵystyń bastalý sebepterine toqtalǵan Tramp Tegerannyń «eshqashan ıadrolyq qarýǵa ıe bolmaýy kerek» ekenin taǵy da aıtty.
— Biz olardyń ıadrolyq qarýy bolǵanyn qalamaımyz. Sondyqtan benzınge sál kóbirek aqsha tóleýge týra kelgen kezde osyny este ustańyz. Qazir bir gallon benzınniń baǵasy 4 dollarǵa jetti. Budan qorqatyn eshteńe joq. Men eshqashan keshirim suramaımyn. Men durys is jasadym, — dedi Tramp.
12 tamyzda janarmaı baǵasyn baqylaıtyn GasBuddy servısiniń munaı naryǵyn taldaý bóliminiń basshysy Patrık De Haan X áleýmettik jelisinde AQSh-ta benzınniń ortasha baǵasy baqylaý tarıhyndaǵy osy kezeń úshin eń joǵary deńgeıge jetkenin habarlady. Baǵa bir gallon úshin 4 dollardan asty.
Buǵan deıin AQSh-ta benzınniń ortasha baǵasy kúntizbelik jyldyń osy kezeńi úshin buryn-sońdy bolmaǵan eń joǵary deńgeıge kóterilgenin habarladyq.
Aıta keteıik, Donald Tramp Iran jaǵalaýyndaǵy USS Abraham Lincoln ushaq tasymaldaýshy keme ekıpajynyń uzaq ýaqyt teńizde júrýine jáne borttaǵy jaǵdaıǵa qatysty alańdaýshylyqty joqqa shyǵardy.
