Donald Tramp AQSh-ta alǵashqy Ulttyq ǵarysh akademııasyn qurý týraly jarlyqqa qol qoıdy
ASTANA. KAZINFORM – AQSh prezıdenti Donald Tramp eldegi alǵashqy AQSh ǵarysh akademııasyn (U.S. Space Academy) qurý týraly jarlyqqa qol qoıdy. Jańa oqý ortalyǵy NASA, AQSh ǵarysh kúshteri jáne qarqyndy damyp kele jatqan kommertsııalyq ǵarysh salasyna mamandar daıarlaýy tıis, dep habarlaıdy Reuters.
Akademııa ınjenerlerdi, ǵalymdardy, operatorlardy jáne AQSh-tyń ǵarysh baǵdarlamalaryn júzege asyrýǵa qajetti basqa da mamandardy daıarlaıtyn tehnıkalyq bilim berý júıesin biriktiredi.
Oqý ornynyń túlekteri Aıdy zertteý, ǵarysh ınfraqurylymyn damytý jáne kommertsııalyq ǵarysh salasyna qatysty jobalarǵa tartylmaq.
Jarlyqqa sáıkes, akademııany qurý jumysymen prezıdenttik komıssııa aınalysady. Komıssııa 120 kún ishinde oqý ornynyń basqarý qurylymy, ornalasatyn jeri, túlekterdiń qyzmet etý sharttary jáne zańnamaǵa engizilýi múmkin ózgerister jóninde usynystar ázirleýi kerek.
Ǵarysh akademııasynyń naqty qaı jerde ornalasatyny ázirge belgisiz.
Jańa oqý ortalyǵyn qurý AQSh ákimshiliginiń ǵarysh baǵdarlamasyn keńeıtý jáne qarqyndy damyp kele jatqan salaǵa qajetti kadrlardy daıarlaý saıasatynyń bir bóligi bolyp otyr.
Buǵan deıin Qazaqstan men AQSh sý tazartý jáne ony qaıta paıdalaný salasyndaǵy yntymaqtastyqty damytyp jatqany týraly jazdyq.
