Donald Tramp AQSh Kongresi saılaýynda merziminen buryn daýys berdi
ASTANA. KAZINFORM — AQSh prezıdenti Donald Tramp 24 qazanda Florıda shtatynda Kongreske aralyq saılaýda merziminen buryn daýys bergenin málimdedi. Bul týraly Kazinform agenttigi TASS-qa silteme jasap habarlady.
Jýrnalıst Respýblıkalyq partııa ókilderine daýys bergen-bermegenin suraǵanda, Tramp daýys bergenin rastady.
— Dál solaı, — dedi Tramp.
AQSh prezıdenti saılaý ýchaskesine jubaıy Melanııamen birge bardy.
AQSh Kongresine aralyq saılaý 3 qarashada ótedi. Degenmen amerıkalyq saılaýshylar merziminen buryn, saılaý ýchaskesine jeke kelip nemese poshta arqyly daýys bere alady.
Saılaý barysynda Ókilder palatasynyń barlyq múshesi men Senat quramynyń úshten biri qaıta saılanady. Qazir Kongrestiń qos palatasy da Respýblıkalyq partııanyń baqylaýynda.
Eske salaıyq, buǵan deıin AQSh-taǵy aralyq saılaý Donald Tramptyń bıliktegi jaǵdaıyna aıtarlyqtaı áser etýi múmkin ekenin jazǵan edik. Eger respýblıkashyldar Kongrestiń bir nemese eki palatasyndaǵy baqylaýynan aıyrylsa, prezıdentke óz saıasatyn júzege asyrý qıyndaı túsedi. Al demokrattardyń prezıdent ákimshiliginiń qyzmetine qatysty tergeý júrgizý múmkindigi keńeıedi. Bul saılaýdyń nátıjesi AQSh úshin ǵana emes, búkil álem úshin nelikten mańyzdy ekenin Kazinform agenttiginiń halyqaralyq sarapshysy Sultan Ákimbekov taldap kórdi. Materıaldy myna siltemeden oqı alasyz.
