Donald Trampqa jańa aıyp taǵyldy

ASTANA. QazAqparat - AQSh-tyń burynǵy prezıdenti Donald Tramp federaldy bıliktiń ózine qupııa qujattardy durys paıdalanbaǵany úshin aıyp taǵyp otyrǵanyn málimdedi. Ol óziniń kinásizdigin alǵa tartyp, qazirgi prezıdentti saıası sebeptermen qýdalady dep aıyptaıdy, dep habarlaıdy QazAqparat VVS-ge silteme jasap.

AQSh aqparat quraldarynyń habarlaýynsha, Trampqa jeti bap boıynsha, onyń ishinde qupııa qujattardy zańsyz saqtaý boıynsha aıyp taǵylǵan.

Oǵan seısenbi kúni tústen keıin saǵat úshte Florıda shtatynyń Maıamı qalasyndaǵy federaldy sot ǵımaratyna kelýge buıryq berilgen.

Bul - Donald Trampqa taǵylǵan ekinshi jáne AQSh-tyń burynǵy prezıdentine qatysty federaldy prokýratýra usynǵan alǵashqy aıyptaý.

«Amerıka Qurama Shtattarynyń burynǵy prezıdentine osyndaı áreketter jasalady dep eshqashan oılamappyn», - dedi Tramp.

«Biz úlken quldyraý aldynda turǵan elmiz. Biraq, biz birigip Amerıkany qaıtadan uly el etemiz!» – dep jazdy ol óziniń sońǵy saılaý naýqanynyń basty uranyn sóz etip.

Donald Tramp 2024 jyly prezıdenttikke qaıta oralý naýqanyn júrgizip jatyr. Eger kináli dep tanylsa, burynǵy prezıdent túrmege qamalýy múmkin.

Sonymen qatar, zańger sarapshylar AQSh zańynda nemese konstıtýtsııasynda onyń saılaý aldyndaǵy naýqanǵa qatysý múmkindigin shekteıtin eshqandaı bap joq ekenin aıtady.

Burynǵy prezıdenttiń zańgeri Djım Trastı CNN-ge bergen suhbatynda Trampqa taǵylǵan aıyptardy egjeı-tegjeıli baıandady.

Onyń aıtýynsha, aıyptaý tiziminde qastandyq, jalǵan aıǵaqtar, sot tóreligine kedergi jasaý jáne tyńshylyq týraly zańǵa sáıkes qupııa qujattardy zańsyz saqtaý bar.

Tramp ózine taǵylǵan aıyppen úzildi-kesildi kelispeıdi.

Truth Social-daǵy habarlamasynda ol Djo Baıdendi taǵy da qatty synǵa alyp, qupııa qujattar qazirgi Amerıka prezıdentimen baılanysty birneshe mekenjaıdan tabylǵanyn eske saldy.