Donald Tramp pen Kım Chen Yn 12 maýsymda kezdesýi múmkin

Tramp taraptardyń Sıngapýrde bolýy tıis kezdesý máselesin áli de talqylap jatqandyǵyn aıtty.

«Ári qaraı ne bolatynyn kóremiz. Kezdesý 12-sinde ótýi múmkin. Dıalog jalǵasyp jatyr. Olar (Soltústik Koreıa) kezdesý ótkizýdi qatty qalaıdy. Biz de sony qalaımyz. Budan ne shyǵatynyn kóremiz», - dep atap ótti Tramp Aq úıde jýrnalısterge.

Keıinirek Tramp Týıtterde qazirgi tańda Qurama Shtattar men Soltústik Koreıa arasynda «nátıjeli kelissózderdiń» júrip jatqandyǵyn jazdy. Eger, bul nátıje berse, kelissózderdiń 12 maýsymda Sıngapýrde ótetinin qosa aıtty.

«Biz Soltústik Koreıamen sammıtti qalpyna keltirý týraly jemisti kelissózder júrgizip jatyrmyz. Eger ol ótetin bolsa, 12 maýsymda Sıngapýrde bolýy múmkin», - dedi ol.

Tramp Soltústik Koreıa tarapynan «ashyq jaýlasý» bolyp jatqandyǵyn aıtyp, bir kún burynǵy kezdesýdi boldyrmaǵan edi. Kım Chen Yn ekeýi Soltústik Koreıadaǵy ıadrolyq baǵdarlamany joıý týraly sóılesý úshin kezdesýge ýaǵdalasqan bolatyn. Biraq, Phenıan jaqynda AQSh-ty birjaqty retpen eldiń ıadrolyq múmkindikten bas tartýǵa májbúrlep, sammıtte qatyspaıtynyn aıtyp, qorqytty dep aıyptady.

Soltústik Koreıa bıligi sársenbi kúngi málimdemesinde AQSh-qa «ıadrolyq» shaqyrý jasap,  AQSh vıtse-prezıdenti Maık Pensti «saıası qaraqshy» dep atady.

Alaıda, Tramp beısenbi kúni sammıtti boldyrmaǵannan keıin, Soltústik Koreıa mundaı málimdemelerin azaıtty.

«Biz amerıkalyq tarapqa kez kelgen ýaqytta máselelerdi sheshý úshin ústelge otyryp, kelissózder júrgizýge nıetti ekendigimizdi túsindirgimiz keledi», - dep málimdedi Soltústik Koreıanyń syrtqy ister mınıstrligi.

Juma kúni Tramp Phenıannyń málimdemesin estip, qýanǵanyn jáne munyń beıbitshilik pen tynyshtyq ornatýǵa ákeletinine senim bildiretinin jetkizdi.

AQSh syrtqy ister mınıstri Djeıms Mettıs sammıttiń bolatynyna úmittenetinin aıtty.