Donald Tramp koronavırýs úshin Qytaıǵa 10 trln dollar tóletpek

NUR-SULTAN. QazAqparat – Dúnıejúzilik densaýlyq saqtaý uıymy adamzat koronavırýspen ómir súrýdi úırenýi kerektigin aıtady. Juqpalylyǵy 40% asatyn «úndilik» shtamǵa baılanysty Ulybrıtanııa lokdaýndy tolyǵymen alyp tastaý máselesin qarastyrar emes. AQSh-tyń burynǵy prezıdenti Donald Tramp Qytaı koronavırýstyń keltirgen zııany úshin 10 trıllıon dollar shyǵyn tóleýi kerektini málimdedi. QazAqparat bul týraly VVS-ge silteme jasap habarlaıdy.

Óz esepteýlerinde álem elderiniń resmı málimetterin paıdalanatyn amerıkalyq Djons Hopkıns ýnıversıtetiniń tsıfrlaryna súıensek, pandemııa kezinde 173 mıllıonǵa jýyq adam koronavırýspen aýyrǵan, 3,7 mıllıonnan astam adam qaıtys boldy, 2 mıllıardtan astam ekpe jasaldy.

DDSU: munymen ómir súrýge týra keledi

Dúnıejúzilik densaýlyq saqtaý uıymy koronavırýstyń tolyq joıylýy aıqyn perspektıvaǵa uqsamaıtynyn málimdedi.

DDSU ókili doktor Devıd Nabarronyń aıtýynsha, vırýs vaktsınalar nemese dári-dármekter arqyly joıylady dep úmittenbeý kerek.

«Adamdar bul vırýspen ómir súrýdi úırenýi qajet. Jańa shtamdar paıda bolady, indet órship, jańa oshaqtary tirkelip otyrady. Biz oǵan úırenýimiz kerek», - dedi doktor Nabarro Sky News telearnasyna bergen suhbatynda.

Brıtanııa: karantın alynbaýy múmkin

Ulybrıtanııa Premer-mınıstri Borıs Djonson baı elderdiń basshylaryn 2022 jyldyń sońyna deıin óz turǵyndaryna vaktsına egý protsesin aıaqtaýǵa shaqyrýǵa nıetti. Djonson bul týraly kelesi jumada Ulybrıtanııanyń Kornýoll qalasynda bastalatyn Úlken jetilik sammıtinde jarııalaıdy dep kútilýde.

21 maýsymda Ulybrıtanııada áleýmettik baılanystarǵa barlyq shekteýler alynyp tastalýy tıis: túngi klýbtar ashylyp, úılený toılary men jerleý rásimderine qonaqtar shaqyrý sanyna engizilgen tyıym kúshin joıatyny kútilýde.

Biraq Densaýlyq saqtaý mınıstri Mett Hankok jeksenbide VVS-ge bergen suhbatynda úkimet shekteýlerdi alyp tastaý máselesin ázirge ashyq qaldyratynyn aıtty. M.Hankok úkimet «21 maýsymǵa deıin» shekteýlerdi alyp tastamaqshy bolǵanyn, biraq ol dál sol kúni oryndalatynyna eshqashan ýáde bermegenin aıtty.

Onyń aıtýynsha, sheneýnikter men dárigerler sheshim qabyldamas buryn jaǵdaıdy baqylaıdy.

Sonymen qatar, mınıstr aýrý juqtyrýshylar sanynyń ósýine qaramastan, aýrýhanaǵa jatqyzý jaǵdaılary is júzinde óspegeninin atap ótti. Bul vaktsınalardyń tıimdiligin dáleldeıdi. Vaktsınanyń eki dozasyn shamamen 23,5 mıllıon brıtandyq alǵan, 33,7 mıllıon brıtandyq bir dozasyn saldyrǵan.

Resmı málimetterge sáıkes, jeksenbide ınfektsııa juqtyrýdyń taǵy 5341 jaǵdaıy tirkelgen. Sońǵy 28 kúnde koronavırýstan 4 adam qaıtys boldy.

Donald Tramp: Qytaı koronavırýs úshin ótemaqy tóleýi tıis

AQSh-tyń burynǵy prezıdenti Donald Tramp uzaq ýaqyt boıy alǵash ret óz jaqtastarynyń aldynda sóz sóılep, Qytaı AQSh pen basqa elderge koronavırýs pandemııasy saldarynan bolǵan adam shyǵyny men zalal úshin 10 trln dollar tóleýi kerektigin málimdedi.

«Barshamyzǵa birige otyryp, «Qytaı bizge tóleýi tıis, tıis!» dep málimdeý qajet. Sondaı-aq barlyq memleket bas qosyp, zalaldyń ornyn toltyrý úshin Qytaıǵa 10 trln dollardy tóletý qajet. Bul, árıne, anaǵurlym tómendetilgen tsıfra», - dedi eks-prezıdent Soltústik Karolınada ótken respýblıkalyqtardyń konferentsııasynda.