Donald Tramp Qazaqstanmen áriptestikti damytýdy joǵary baǵalaıdy - AQSh Memhatshysy
Eki eldiń syrtqy ister vedomstvolarynyń basshylary Qazaqstan Respýblıkasynyń Prezıdenti Nursultan Nazarbaevtyń 2018 jyldyń qańtarynda AQSh-qa resmı sapary barysynda qol jetkizilgen ýaǵdalastyqtardyń dáıekti túrde júzege asyrylýyn qanaǵattanýshylyqpen atap ótti. Maıkl Pompeo Qazaqstan kóshbasshysy saparynyń mańyzdylyǵyn aıryqsha atap ótip, AQSh Prezıdenti Donald Tramp Vashıngtonda qol jetkizilgen ýaǵdalastyqtardy jáne Qazaqstanmen ekijaqty áriptestikti damytýdy joǵary baǵalaıtynyn atap ótti.
Suhbattastar Qazaqstan men AQSh arasyndaǵy keńeıtilgen strategııalyq áriptestikti damytý máseleleriniń keń aýqymyn, atap aıtqanda, saýda-ekonomıkalyq jáne ınvestıtsııalyq, energetıka, aýyl sharýashylyǵy jáne basqa da salalardaǵy yntymaqtastyqty nyǵaıtý perspektıvalaryn talqylady. Túrli deńgeıdegi ekijaqty baılanystardyń, onyń ishinde halyqaralyq forýmdar aıasyndaǵy kestesi qarastyryldy.
Qazaqstan Syrtqy ister mınıstri men AQSh Memlekettik hatshysy aımaqtyq jáne halyqaralyq kún tártibindegi ózekti máseleler boıynsha baıymdy pikir almasty. Qazaqstannyń álemdegi tórtinshi ıadrolyq arsenalynan bas tartý tájirıbesi Soltústik Koreıanyń ıadrolyq baǵdarlamasy men Koreı túbeginiń ıadrolyq qarýsyzdanýyna da qatysty jaǵdaıdy retteý úshin úlgi bolatyny atap ótildi.
Eki tarap óńirlik formatta jemisti ózara árekettestiktiń mańyzdylyǵyn, sondaı-aq Aýǵanstannyń turaqtylyǵyn jáne turaqty damýyn qamtamasyz etý boıynsha Qazaqstan jáne Ortalyq Azııanyń AQSh-pen jáne basqa áriptestermen yntymaqtastyǵynyń mańyzdylyǵyn atap ótti. Qazaqstandyq dıplomat qazaqstandyq joǵary oqý oryndaryndaǵy aýǵan stýdentterine arnalǵan bilim berý baǵdarlamasynyń tabysty iske asyrylýyna, sondaı-aq Astanada ótýge josparlanǵan «Aýǵanstandaǵy áıelderdiń quqyqtary men múmkindikterin jaqsartý» jónindegi Óńirlik konferentsııasyna nazar aýdardy.
Qazaqstannyń Syrtqy ister mınıstri Memlekettik hatshy Maıkl Pompeonyń Qazaqstanǵa yńǵaıly ýaqytta sapar jasaýy jónindegi óziniń shaqyrýyn rastady.
