Donald Tramp Qazaqstandy Táýelsizdik kúnimen quttyqtady
ASTANA. QazAqparat - AQSh Memlekettik hatshysynyń Ońtústik jáne Ortalyq Azııa isteri jónindegi kómekshisiniń birinshi orynbasary Elıs Ýells Qazaqstan Táýelsizdigi kúnine oraı AQSh prezıdenti Donald Tramptyń joldaǵan quttyqtaýyn jetkizdi, dep habarlaıdy «QazAqparat» HAA tilshisi.
«Qazaqstan Prezıdenti Nursultan Nazarbaevtyń AQSh-qa resmı sapary kezinde eki eldiń basshylary qol jetkizgen ýaǵdalastyqtardy iske asyrý kezinde jetken shynaıy oń progress úshin qazaqstandyq tarapqa alǵysymdy bildiremin», - dedi Elıs Ýells búgin Astanada Qazaqstan-Amerıka keńeıtilgen strategııalyq seriktestik jónindegi komıssııanyń kezektegi otyrysyna arnalǵan brıfıngte.
Elıs Ýells atap ótkendeı, taraptar otyrys kezinde Qazaqstannyń BUU Qaýipsizdik Keńesindegi ekijyldyq músheligin, sondaı-aq múshelik aıasynda Qazaqstannyń júrgizgen saıasatyn talqylady.
«Sondaı-aq, sizder aldaǵy kúnderi atap ótetin Táýelsizdik kúnine oraı Tramp myrzanyń quttyqtaýyn jetkizgim keledi. Sizderge múmkin bolǵan barlyq qoldaýdy kórsetýge daıynbyz», - dedi ol.
Avtory Kamıla Ámirova
