«Don Kıhotty» 6 myńnan astam adam tamashalady (FOTO)
ASTANA. QazAqparat - Aty ańyzǵa aınalǵan «La Skala» teatrynyń «Astana Operada» sahnalanǵan «Don Kıhot» baletin 6 myńnan astam kórermen tamashalady. Bes kún boıy ótkizilgen balettiń serııaly tusaýkeserine TMD elderinen de qonaqtar keldi. Qoıylymnyń basty qoǵany - QR Prezıdenti Nursultan Nazarbaev boldy, dep habarlaıdy «Astana Opera» teatrynyń baspasóz qyzmeti.
«La Skala» teatrynyń kelýi shynymen tarıhı oqıǵa boldy. Sapar barysynda ıtalıandyqtar qazaqstandyq áriptesteriniń «Aqqýly kól» baletiniń repetıtsııasyna qatysyp, tánti boldy. Italıandyq teatrdyń balettik trýppa jetekshisi Mahar Vazıev baletke joǵary baǵa berdi, soynyń ishinde eki balet ártisi - Aıgerim Beketaeva men Erkin Rahmatýllaevtyń talantyn erekshe atap ótti, dep jazylǵan «Astana Opera» baspasóz qyzmeti taratqan habarlamada. ««La Skala» balettik trýppasynyń kordebaleti tamasha jattyqqan, túzý, birdeı qımyldaıdy. Balerınalar uıqydaǵy kórinisti uqypty oryndap shyqty, syǵandar sahnasy tipti qaıran qaldyrdy. Ártister sahnada ǵajap bıledi, sheberlikterin kórsetti», - dep baǵalady «Astana Opera» baletiniń kórkemdik jetekshisi, QR Eńbek sińirgen qaıratkeri Tursynbek Nurqalıev. Qos teatr basshylyǵynyń birlesip atqarǵan jumysy jemisin berdi. Mılandyq teatrdyń gastroli barysynda ótken kelissózder nátıjesinde «Astana Opera» teatrynyń «La Skalaǵa» jaýapty gastrolmen barý múmkindigi talqylanyp, áriptestik jóninde memorandýmǵa qol qoıyldy. Sóıtip, bıylǵy jyldyń kúzde «La Skala» teatry men «Astana Opera» Dj. Verdıdiń «Aıda» (qoıýshy rejısseri Franko Dzeffırellı, Italııa) operasyn qoıýdy josparlap otyr.
