«Don Kıhot» baleti - «Astana Opera» sahnasynda
ASTANA. QazAqparat - Qazaqstanda alǵashqy ret «Astana Opera» teatrynyń sahnasynda La Scala óner kórsetedi. Aty ańyzǵa aınalǵan teatr 30 maýsym men 4 shilde aralyǵynda «Don Kıhot» baletin usynady.
Bul týraly «Astana Opera» teatrynyń baspasóz qyzmeti habarlady.
Rýdolf Nýrıevtiń belgili horeografııasyndaǵy La Skala repertýarynyń 1980 jylǵy qoıylymy uly klassıkalyq baletter panteonynda óziniń laıyqty ornyn ıelendi.
Baletke mılandyq teatrdyń shyǵarmashylyq ujymynan 100 astam adam qatysady. Atalǵan qoıylym qos teatr arasynda tyǵyz baılanys ornatýǵa múmkindik berdi. Eki jyldan astam ýaqyt buryn bastaý alǵan áriptestik qarym-qatynas alǵashqy nátıjesin bere bastady, osylaıshaa «Astana Opera» teatrynda La Scala túpnusqadaǵy spektakli - Lýka Ronkonıdiń qoıylymyndaǵy «Toska» operasy usynyldy. Kúzde La Scala-nyń kezekti spektakli - «Aıda» operasynyń tusaýy kesiledi, rejısseri Franko Dzefırellı. Sonymen qatar La Scala teatrynyń Akademııasymen bilim alý salasyndaǵy seriktestik jónindegi joba júzege asyrylyp jatyr.
Teatrdyń bas baletmeısteri Mahar Vazıev jetekshilik etetin mılandyq balettik trýppa, ataqty klassıkalyq balettiń eń qıyn nusqalarynyń biri sanalatyn Rýdolf Nýrıevtiń erekshe qoıylymyndaǵy kózdiń jaýyn alatyn tehnıkany jáne qushtarlyqty pash etedi.
«Don Kıhot» balettik spektakliniń tarıhy 18 ǵasyrdyń ekinshi jartysynan bastalady. La Scala sahnasynda 1980 jyly qoıylǵan Nýrıev nusqasy joǵary óner súıer qaýym úshin eń súıiktilerdiń biri bolyp tabylady. Ártisterge kórkemdikti tolyqqandy jetkizý úshin oryndaý barysynda erkindik beretin bul akademııalyq balet shynymen-aq qulshynyspen oryndaýdyń jarqyn nusqasy.
Nýrıev óz qoıylymynda basty erkektiń partııasyn óziniń talabyna saı jetildirip, balettiń sahnalyq qoıylymyn kúrdeli etti. 1987 jyly La Scala teatrynyń bul spektakli Rafael del Savıonyń jańa dekoratsııasymen jáne Anna Annıdiń kostıýmderimen jańartylyp, kúni búginge deıin balettik trýppany jarqyratyp, áserli etip keledi.
Qazaqstandyq kórermen nazaryna usynylatyn La Skalanyń ataqty quramy: jetekshi solıst Nıkoletta Mannı (Kıtrı / Dýlsıneıa) jáne jas, talantty solıst Karlo Dı Lanno (Bazıl), ekinshi quramda Vırno Toppı men Antonıno Sýtera, Lıýsımeıa Dı Stefano men Klaýdıo Kovello. Basty partııamen qatar La Scala balettik trýppasynyń Djýzeppe Konte (Don Kıhot), Djanlýka Skıavonı (Sancho Pansa), Rıkardo Massımı jáne Marko Messına (baı aqsúıek Gamash), Metıý Endıkott (Lorentso), Alessandra Vassalo (kóshe bıshisi), Mık Zenı, Marko Agýstıno jáne Massımo Garon (Espada), Vırna Toppı (Drıadalar Korolevasy), ekinshi quram - Nıkoletta Mannı, Serena Sarnataro (Amýr) jáne Danıella Kavallerı (ekinshi quram), Frederıko Fresı (syǵan), qalyńdyqtyń qurbylary - Vırna Toppı jáne Lıýsımeı Dı Stefano. Kıtrıdiń qurbylary - Lıýsımeı Dı Stefano, Dennız Gatstso jáne Vıttorııa Valerıo sııaqty kóptegen ártisteri óner kórsetedi.
Mýzykalyq bóligi La Scala teatrynyń dırıjery Marsello Spakarotella basshylyq etetin «Astana Operanyń» sımfonııalyq orkestrine senip tapsyryldy.
La Scala teatrynyń «Astana Operadaǵy» gastroliniń bas demeýshisi «Samuryq-Qazyna» ulttyq ál-aýqat qory.
