«Don Kıhot» Astanada
ASTANA. QazAqparat - Mıgel Servantestiń romany boıynsha qoıylǵan L. Mınkýstyń áıgili «Don Kıhot» baleti 1 jáne 2 sáýir kúnderi «Astana Opera» teatrynyń sahnasynda usynylady, dep habarlaıdy QazAqparat.
Basty partııalardy oryndaýǵa daıyndalyp jatqan talantty ártister - Ánel Rústemova (Kıtrı), Qazaqstannyń eńbek sińirgen qaıratkeri Taıyr Gataýov (Bazıl), Eldar Shakırzıanov (Espada) «Astana Opera» sahnasynda bul spektaklde alǵash ret óner kórsetpekshi.
Qoıýshy baletmeıster - «Astana Opera» balettik trýppasynyń kórkemdik jetekshisi, Reseıdiń halyq ártisi - Altynaı Asylmuratova. Qoıýshy dırıjeri - Arman Orazǵalıev.
«Bul baletti oryndaý - úlken ǵanıbet. Klassıkalyq bımen almasatyn minezdi bı shyńdalǵan tehnıkamen qatar, akterlik sheberlikti de qajet etedi. Spektaklge qatysatyn balet trýppasynyń barlyq quramy halyq kóp qonystanǵan Barselonadaǵy adam taǵdyrynyń túrli kórinisin: qýanyshy men qaıǵysyn jetkizedi. Spektakl qýanyshqa, júrekke jylý uıalatatyn sátterge qanyq, maqsatymyz osy atmosferany kórermenge jetkizý», - deıdi balet ártisteri.
M. Petıpa baletti 1869 jyly M. Servantestiń «Don Kıhot» romanynyń jelisimen qoıǵan. Marıýs Petıpa áıgili ádebı týyndynyń ekinshi tomyndaǵy aýqatty Kamacho (balette - Gamash) men aýyldyq jas jigit Bazılıoǵa (Bazılıa) ǵashyq sulý qyz Kıtterııdiń (Kıtrı) bolmaı qalǵan úılený toıy týraly áńgimeleıtin, tek eki bólimin ǵana paıdalanǵan.
«Spektaklde beıne keskinder, sonymen qatar qyzyq anımatsııa paıdalanylǵanyn atap óteıik. Sahnaǵa tiri janýarlar shyqqanda, kórermen árkez shattyqqa bólenedi», - dep atap ótti teatrdyń baspasóz qyzmetinen.
