«Domodedovo» áýejaıynda bolǵan lańkestiktiń saldarynan 35 adam qaza tapty, 180 adam jaralandy

Reseıdiń Tótenshe jaǵdaılar mınıstrliginiń saǵat 23.00-tegi deregi boıynsha, jarylys saldarynan 35 adam kóz jumǵan, 86 adam aýrýhanalarǵa jatqyzylǵan, 94 adamǵa ambýlatorlyq jaǵdaıda kómek kórsetilgen.

Qaza bolǵandardyń arasynda sheteldikter, atap aıtqanda Slovakııa, Italııa, Frantsııa, Ulybrıtanııa, Germanııa, Túrkııa, Tájikstan azamattary bar. Reseıdiń resmı organdary «Domodedovo» áýejaıyndaǵy jarylystyń saldarynan zardap shekken Qazaqstan azamattary týraly eshteńe habarlaǵan joq. Qazaqstannyń Reseıdegi elshiligindegi derekkózdiń de aqpary boıynsha, Qazaqstan azamattary týraly qandaı da málimet túsken joq.

Bul fakti boıynsha RF Tergeý komıteti RF Qylmystyq kodeksiniń 205-baby (lańkestik), 105- baby (adam óltirý) jáne 222-baby (qarý-jaraq pen jarylǵysh zattardyń zańsyz aınalymy) boıynsha qylmystyq is qozǵap otyr.

Quqyq qorǵaý organdarynyń aqparaty boıynsha, kelýshilerdi qarsy alyp turǵan toptyń ishinde bolǵan jankeshti saǵat 16.33 kezinde jarylǵysh zatty iske qosqan. Lańkestik qurbandarynyń qatarynda taksı júrgizýshileri men qarsy alýshylar kóp bolǵan. Bombanyń qýaty trotılge balama 5-7 kelini shamalap otyr.

RF Prezıdenti Dmıtrıı Medvedev lańkestik oqıǵaǵa baılanysty ótkizilgen shuǵyl keńeste Reseıdiń barlyq áýejaılary men iri kólik toraptarynda erekshe rejım engizýge buıryq berdi. Ol sondaı-aq lańkestik saldarynan zardap shekkenderge jáne qaza bolǵandardyń otbasylaryna kómek kórsetýdi mindettedi. «Zardap shekkender dereý medıtsınalyq kómek alýlary úshin, qoldan kelgenniń bárin jasaý kerek. Qaza bolǵandardyń otbasylaryna kóńil aıtamyn», - dep málim etti RF basshysy.