Domınıkandaǵy oqıǵa qurbandarynyń sany 200-den asty

ASTANA. KAZINFORM – Domınıkan Respýblıkasyndaǵy Jet Set klýbynda bolǵan oqıǵada qaza tapqandar sany 200-den asty. Bul týraly Tótenshe jaǵdaılar ortalyǵynyń basshysy Hýan Manýel Mendes málimdedi, dep jazady Report. 

– Ókinishke qaraı, biz aldyn ala málimetter boıynsha 218 adam qaza bolǵany týraly aıtyp otyrmyz, – dedi ol.

8 sáýir kúni tańerteń el astanasy Santo-Domıngodaǵy Jet Set túngi klýbynda ánshi Rýbı Peres óner kórsetip jatqanda klýb shatyry opyrylyp qulaǵan.

Jet Set – dúısenbide kontsertter ótkizetin Santo-Domıngodaǵy tanymal túngi klýb. Oqıǵa kúni Rýbbı Perestiń kontsertine belgili saıasatkerler, sportshylar jáne basqa da juldyzdar kelgen.

Ánshi Rýbbı Peres úıindilerdiń astynda qalyp, keıin qutqarylǵan, ol alǵan jaraqattarynan qaza boldy. Qaza tapqandar arasynda Monte-Krıstı provıntsııasynyń gýbernatory Nelsı Krýz jáne 51 jastaǵy tanymal beısbolshy Oktavıo Dotel de bar. 

Domınıkan Respýblıkasynyń prezıdenti Lýıs Abınader 8 sáýirden bastap qurbandardy eske alý úshin 3 kún ulttyq aza tutý kúnin jarııalady.

Qutqarý jumystary jalǵasyp jatyr. Apattyń sebepteri anyqtalyp jatyr. 

Aıta keteıik, buǵan deıin Jet Set túngi klýbyndaǵy oqys oqıǵada qaza tapqandar sany 184-ke jetkenin jazǵan edik.