Domınıkandaǵy oqıǵa: kóz jumǵandar sany 100-ge jýyqtady

ASTANA. KAZINFORM – Domınıkan Respýblıkasynda túngi klýbtyń shatyry qulap, 98 adam qaza tapty. Bul týraly «Listin Diario» gazeti habarlady.

Eldegi jedel járdem ortalyǵynyń dırektory Hýan Manýel Mendestiń aıtýynsha, oqıǵa saldarynan taǵy 146 adam jaraqat alyp, aýrýhanaǵa jetkizilgen. Qutqarý jumystary áli de jalǵasyp jatyr.

Oqıǵa 8 sáýir kúni tańerteń el astanasy Santo-Domıngodaǵy Jet Set túngi klýbynda ánshi Rýbı Peres óner kórsetip jatqan kezde bolǵan. Ánshi kórermendermen birge qulaǵan shatyrdyń astynda qaldy. Ánshi qutqarylǵan. Qazirgi ýaqytta onyń jaǵdaıy turaqty.

Anadoly agenttiginiń habarlaýynsha, Qaıtys bolǵandardyń arasynda Beısbol lıgasynyń (MLB) burynǵy oıynshysy Oktavıo Dotel de bar.

Elde úsh kún qaraly dep jarııalandy

Domınıkan Respýblıkasynyń prezıdenti Lýıs Abınader qaıǵyly oqıǵaǵa baılanysty úsh kúndik ulttyq aza tutý jarııalady.

Jaǵdaıdy óz kózimen baqylap, tekserý júrgizgennen keıin Abınader bolǵan qaıǵyly oqıǵaǵa qatty ókinish bildirdi.

– Barlyq qutqarý qyzmeti qajetti kómek kórsetti jáne qutqarý jumystaryn júrgizý úshin aıanbaı eńbek etip jatyr, – dedi prezıdent.

«Jet Set» Domınıkan Respýblıkasyndaǵy eń tanymal oıyn-saýyq oryndarynyń biri bolyp sanalady.

Aıta keteıik, buǵan deıin Domınıkanada kontsert kezinde shatyr opyrylyp, 80-ge jýyq adam qaza tapqanyn jazǵan edik.