Domınıkanada kontsert kezinde shatyr opyrylyp, 80-ge jýyq adam qaza tapty

ASTANA. KAZINFORM – 8 sáýir, seısenbi kúni keshke Santo-Domıngodaǵy (Domınıkan Respýblıkasy) túngi klýbta kontsert kezinde shatyr opyrylyp qulap, kem degende 79 adam qaza tapty, dep habarlaıdy DW.

Qutqarý qyzmetiniń dırektory Hýan Manýel Mendestiń aıtýynsha, taǵy 155 adam jaraqat aldy, al qaza tapqandar sany artýy múmkin. 400-ge jýyq qutqarýshy iz-túzsiz joǵalǵan adamdardy úıindilerden izdestirip jatyr.

Jergilikti BAQ-tyń habarlaýynsha, el astanasy Santo-Domıngodaǵy tanymal Jet Set klýbynyń shatyry merenge ánshisi Rýbbı Perestiń óner kórsetýi kezinde kenetten opyrylyp tústi. 69 jastaǵy ánshi de úıindi astynda qalyp qoıǵan.

Ánshiniń qyzynyń aıtýynsha, ol ákesiniń tiri ekeni týraly habardy oqıǵadan birneshe saǵat ótken soń alǵan. Jaraqat alǵan ánshi áli úıindi astynda jatyr.

Kýágerlerdiń baıandaýynsha, shatyr kenet opyrylyp túsken – olardyń biri alǵashynda jer silkinisi boldy dep oılap, basyn jaýyp edenge jata qalǵanyn aıtty.

Taǵy bir kýágerdiń aıtýynsha, aldymen tóbeden sylaq, sodan keıin ústelge tas qulap, odan keıingi soqqyny tsýnamı nemese jer silkinisimen salystyrǵan. 

Bılik apat kezinde túngi klýbta qansha adam bolǵany týraly málimet bergen joq. BAQ málimetinshe, onda 500-1000 kelýshi bolǵan. 

Domınıkan Respýblıkasynyń prezıdenti Lýıs Abınader qaıǵyly oqıǵa ornyna kelip, basty maqsat adam ómirin saqtap qalý dep atady. Onyń aıtýynsha, qaza tapqandar arasynda Monte-Krıstı provıntsııasynyń gýbernatory Nelsı Krýz bar, ol aýyr jaraqattan aýrýhanada kóz jumdy. 

Eldiń týrızm mınıstrliginiń málimetinshe, Karıb teńizinde ornalasqan týrıster arasynda tanymal jerge 2024 jyly 11 mln-nan astam adam kelgen.

Buǵan deıin Mıanmadaǵy jer silkinisinen qaza tapqandar sany 3,5 myńnan asqanyn jazǵan bolatynbyz.