Domınıkan mınıstri Qazaqstanǵa alǵash ret resmı saparmen keldi
Qazaqstan men Domınıkan Respýblıkasynyń arasyndaǵy dıplomatııalyq qarym-qatynastar 2011 jyly ornatylǵan bolatyn. Endi, araǵa alty jyl salyp, Domınıkan Respýblıkasynyń mınıstri Qazaqstanǵa resmı saparmen kelip otyr. Búgin eki eldiń syrtqy ister mınıstrleri uzaq keńesti. Sonyń nátıje boıynsha birlesken saıası deklaratsııany rásimdedi. "Bul deklaratsııada ekijaqty baılanystardyń negizgi aspektileri men aldaǵy vedomstvoaralyq qujattardyń mańyzdylyǵy kórsetilgen. Kelissózder kezinde biz ózekti máselelerdi talqyladyq. Astana men Santo-Domıngo arasynda saıası, saýda-ekonomıkalyq, ınvestıtsııalyq, týrıstik jáne mádenı-gýmanıtarlyq baılanystardy keńeıtýge múddeli ekenimizdi bildirdik. Taraptar ózara saýda men ınvestıtsııalardy arttyrýǵa nıetti", - dedi QR Syrtqy ister mınıstri Qaırat Ábdiraxmanov kezdesýden keıingi baspasóz máslıxatynda.
Óz kezeginde Domınıkannyń syrtqy ister mınıstri Mıgel Varges Malddonado alǵys bildirip, osy sapar barysynda naqty qujattardy rásimdeýge múddeli ekenin jetkizdi. "Negizgi maqsat - saýda-ınvestıtsııalyq baılanystarymyzdy jańa deńgeıge kóterý. Budan bólek, biz EKSPO-2017 kórmesinde ashylatyn Domınıkan Respýblıkasynyń ulttyq pavılony aıasyndaǵy jumysqa belsene atsalysatyn bolamyz. Sol arqyly ekijaqty saýda-ekomıkalyq jáne iskerlik qarym-qatynasty damytýǵa kúsh salamyz", - dep atap kórsetti Maldonado.
Aıta keteıik, búgin Domınıkan eliniń delegatsııasyn QR Premer-Mınıstri Baqytjan Saǵyntaev qabyldaıdy. Odan keıin olar Bas prokýratýra, QR Mádenıet jáne sport mınıstrligi, QR Energetıka mınıstrligi men "Atameken" UKP basshylyǵymen kezdesedi. Budan bólek, domınıkandyqtar Almaty qalasyna saparlaıdy. Barlyq kezdesýlerdiń nátıjesi boıynsha birqatar qujattarǵa qol qoıylýy kózdelip otyr.
