Dombyra kúni kontsert emes, ulttyq aspapty zertteý jumystary mańyzdy -sheber
AQTÓBE. QazAqparat -Ultttyq dombyra kúni aqtóbelik sheberler dombyra jasaý joldaryn qala turǵyndaryna kórsetti. Sheber Erqosaı Ábilov dombyra kúninde kontsertter uıymdastyrýdy azaıtyp, zertteý jumystaryna kóp kóńil bólý kerek dep esepteıdi, dep habarlaıdy QazAqparat tilshisi.
Elimizdegi dombyra jasaıtyn has sheberlerdiń biri Erqosaı Ábilov bıyl Ulttyq dombyra kúnine daıyndyqtyń tym az bolǵanyn, keler jyly kontserttik baǵdarlamalarǵa emes, zertteý jumystaryna kóp kóńil bólinýi qajet ekenin aıtyp berdi.
«Bir aı daıyndalyp, júzdegen is-shara uıymdastyryldy. Eger bir jyl boıy daıyndyq júrgizsek, keremet bolar edi. Bul kúni kontsert qoıyp, toı-dýman uıymdastyryp qoımaı, zertteýge kóp kóńil bólý qajet. Sheberlerge de jaǵdaı jasaǵan durys. Jumeken Nájimedenovtyń «Dombyranyń qońyr úni» degen kitaby bar. Sol kitapta zertteý jumystary jan-jaqty jazylǵan. Zertteýshi «dombyranyń ishegin daıyndaıtyn sheber bolar ma eken» dep óz oıyn qaldyrǵan. Men jasaımyn, almatylyqtar tapsyryspen alady. Biraq jalǵyz ózim bárine úlgermeımin. Zergerlik, bes qarý, saýyt, dombyra jasap júrgende ishek jasaýǵa ýaqyt bolmaı qalady. Іshek jasaýdy damytyp, dombyraǵa eskertkish qoıýǵa keńes berer edim»,- dedi sheber Elqosaı Ábilov.
Aıta keteıik, sheber Aqtóbe oblysynyń Mártók aýdany eskertkish qoıýǵa yńǵaıly tarıhı oryn dep esepteıdi. Sebebi, «Aqsaq qulan» kúıi quryp bara jatqanda kúıshi Qambar Medetov ony qaıta ómirge ákeldi. Bul Mártókte bolǵan oqıǵa, eskertkishti sol aýdanǵa qoıý týraly usynystyń máni osynda jatyr.
«Bir jyldan soń eskertkishtiń ashylýyn tamashalasaq jaqsy bolar edi. Ózim dombyranyń oıý-órnegine arnalǵan kitap daıyndap qoıdym. Kitabym qarjy tapshylyǵynan shyqpaı qaldy. Eger memleketten qoldaý bolsa sheberler de dombyra jasaý joldaryn saqtap qalýǵa bar kúshin salar edi. Máselen, «Orteke» konkýrsynyń eki jeńimpazy aqtóbelik. Biri Abdýlhamıt Raıymbergenov, ekinshisi kúıshi Baqyt Basyǵaraev. Nátıjeni qosyp, «Orteke» oryndaýshylary jáne «Orteke» sheberleri» dep kitap jazý oıda bar. Tarıhty zerttep, aqparattar jınaqtalyp jatyr. Bárine qarjy kerek»,- dedi sheber.
Aıta keteıik, sheber Erqosaı Ábilov dombyranyń qos ishegin jasaýdy 12 jyl boıy zerttep, sapaly ishek daıyndap shyqty. Keıbiri dombyra ishegin 6 aı boıy kútip júr.
«Tehnologııasy bar, biraq kitap bolyp shyqpady. Kúıshi Abdýlhamıt Raıymbergenovpen birge synaqtan ótkizgen edik. Іshek jasaýdy ýaqytpen sanaspaı jasaý kerek. Bárine qarjy tapshylyǵy qolbaılaý bolyp tur»,- dedi Erqosaı Ábilov.
