Dombyra kúni: Ankarada qazaqtyń ulttyq meıramy úsh kún boıy toılandy
Aıtýly is-shara Ankaranyń eń kórikti jerleri - tarıhı Estergon qamaly, Ankara qamaly, «Túrkistan» ǵımaraty, Túrkııa Respýblıkasynyń Prezıdenti ákimshiliginiń kitaphanasy, Túrik tarıhy mýzeıinde ótti.
Festıval aıasynda arasynda qazaq, túrik, tatar, noǵaı, japon halyqtarynyń ókilderi bar 50 dombyrashydan quralǵan orkestr 4 aı boıy jasaǵan daıyndyqtyń nátıjesinde qazaqtyń kúılerin bir mezette oryndap, ankaralyqtardy ǵajap kúıge bóledi.
Ulttyq dombyra kúnine oraı mundaı aýqymdy shara shetelde alǵash ret uıymdastyrylyp otyr.
Festıval Túrkııa Respýblıkasynyń Prezıdenti ákimshiliginiń ulttyq kitaphanasynda saltanatty kontsertpen ashyldy.
Oǵan Qazaqstan Elshisi Abzal Saparbekuly, kitaphana basshysy Aıhan Týglý, Túrkııadaǵy Qyrǵyzstan, Albanııa, Iran jáne Majarstan elshileri, parlament depýtattary, túrik elinde bilim alyp jatqan stýdentter men BAQ ókilderi qatysty.
Kontsertte dombyrashylarmen qatar, Qazaqstan jáne Túrkııanyń óner maıtalmandary, atap aıtqanda Qazaqstannyń mádenıet qaıratkeri Elmıra Shendýran, Qazaqstan jáne Mońǵolııanyń eńbek sińirgen ártisi Merýesh Bashaı, Túrkııada qazaqtyń qasıetti aspabyn dáriptep júrgen Shámshigúl Júsipova men Sedat Solakoglý, Túrki dúnıesi orkestriniń mýzykanty, belgili kompozıtor Irfan Gúrdal, Maıa Ismaılova, noǵaı halyq jyraýy, dombyrashysy, ári aqyny Arslanbek Sultanbekov sııaqty óner ıeleri de qazaq halyq ánderin kórermenge pash etti.
Taǵylymy tereń mazmundy merekeniń uıymdastyrylýy - ultymyzdyń tereń tamyrly mádenıetin asqaqtatyp, rýhyn kóterdi.
«Túrik tarıhı mýzeıinde» festıvaldiń aıaqtalýyna oraı saltanatty kontserttik baǵdarlama ótti. Oǵan Qazaqstan Elshisimen qatar Etımesgýt aýdanynyń ákimi Enver Dımerel, mýzeıdiń dırektory Ahmet Iyldyrym, parlament depýtattary, jergilikti zııaly qaýym jáne BAQ ókilderi qatysty.
Elshi A. Saparbekuly óz sózinde:
«Dombyra qazaqtyń ulttyq aspaby ǵana emes, halyq murasy. Qazaq qashanda dombyrany qadir tutyp, tórge ilip, baǵalaǵan. Kıeli aspaptyń qurmetine 2018 jyly Elbasynyń jarlyǵymen Ulttyq dombyra kúni bekitildi. Sonaý kóne tarıhtyń kúmbirin búgingi kúnge jetkizgen kıeli de qasıetti Dombyramyzdy órkenıetti zamanǵa saı jańǵyrta bilsek, keleshek jastarǵa ulttyq tárbıe beretin ónege bastaýy, ári rýhanı qazynasy bolary shyndyq», - dep dombyra kúniniń mańyzyna toqtaldy.
Sondaı-aq osyndaı aýqymdy sharanyń alǵash ret Túrkııada ótip jatqanyn ataı kele, uıymdastyrýshylar men qoldaý kórsetken baýyrlas túrik halqyna alǵysyn bildirdi.
Elshi ulttyq ónerdi jalǵastyrý men qasıetti dombyrany serik etken ónerpazdarǵa izgi tilegin bildire kele, olardy alǵys hatpen marapattady.
