Dombyrany ushaq bortynda alyp júrýge ruqsat etilýi múmkin
ASTANA. KAZINFORM – QR Kólik vıtse-mınıstri Talǵat Lastaev dombyrany jáne basqa da mýzyka aspaptardy ushaq bortynda alyp júrýge qatysty túsinik berdi.
- Dál osy másele boıynsha tıisti usynystar pysyqtalyp jatyr. Kólik mınıstrliginiń Azamattyq avıatsııa komıtetine mýzyka aspaptaryn, onyń ishinde dombyrany tasymaldaý boıynsha zańnamalyq retteý tetigin engizý tapsyryldy. Meniń oıymsha, jaqyn arada jolaýshylar men júkterdi jáne bagajdy tasymaldaý erejesine tıisti ózgeris engizemiz. Bul turǵyda aspaptardy qandaı tártippen ushaq bortynda alyp júrýdiń naqty qaǵıdaty bolady, - dedi T. Lastaev Senatta tilshiler suraǵyna jaýap bere otyryp.
Onyń aıtýynsha, bul sheshim bir aıdyń ishinde qabyldanady.
- Qoǵamnan bul baǵytta usynystar boldy. Sondyqtan bárine ortaq ereje bekitiledi. Bul tártip áýe kompanııalarynyń barlyǵyna qatysty bolady, - dedi vıtse-mınıstr.
Osy oraıda ol ońtaıly sheshim qabyldanǵan jaǵdaıda mamyr aıynan bastap jolaýshylar dombyrany ushaq bortynda tasymaldaı alatynyn rastady.
Eske salsaq, 2023 jyly aıtysker aqyn Aısholpan Tileýtaı Fly Arystan ushaǵyna dombyrasyn alyp kirýge ruqsat berilmegenin áleýmettik jelidegi paraqshasynda jazǵan edi. Keıin Májilis depýtaty ushaqtarǵa ulttyq aspaptardy kirgizbeýge qatysty áýe kompanııalarynyń áreketin synǵa aldy.
2024 jyly dombyrany ushaq bortynda alyp júrý úshin júk tasymaldaý sharttary ózgerýi múmkin ekenin aıtylǵan.