Dombyrany ushaq bortynda alyp júrýge ruqsat etildi
ASTANA. KAZINFORM — QR Kólik mınıstrligi «Jolaýshylardy, bagajdy jáne júkterdi áýe kóligimen tasymaldaý qaǵıdalaryn bekitý týraly» tıisti buıryqqa ózgeris pen tolyqtyrý engizip jatyr.
- Joba aıasynda azamattardyń kóptegen ótinishi negizinde alǵash ret normatıvtik deńgeıde jolaýshylardyń mýzykalyq aspaptardy (onyń ishinde dombyra men qobyzdy) fýtlıarda áýe kemesiniń salonynda qol júgi retinde tasymaldaý quqyǵy bekitiledi. Bul rette olardyń ólshemderi 110×35×30 sm-den, al salmaǵy 10 keliden aspaýy tıis, - delingen mınıstrliktiń aqparatynda.
Atalǵan túzetýlerge sáıkes, eger jolaýshy tek bir mýzykalyq aspapty, ıaǵnı dombyrany alyp júrse, ony tasymaldaý qol júgi retinde tegin ótkizedi. Al mýzykalyq aspap qol júginiń qosymsha bóligi retinde tasymaldanǵan jaǵdaıda, belgilengen normadan asatyn júk úshin áýe kompanııalarynyń qoldanystaǵy qaǵıdalaryna sáıkes aqy alynady.
- Bul túzetýlerdi qabyldaý jolaýshylardyń quqyǵyn qorǵaý deńgeıin arttyrýǵa jáne áýe kóliginde mýzykalyq aspaptardy tasymaldaýdy retteýdi jetildirýge baǵyttalǵan. Túzetýlerdi qabyldaýdyń boljamdy merzimi – 2026 jylǵy mamyr aıynyń sońyna deıin, - dep atalyp ótken vedomstvo aqparatynda.
Aıta keteıik, jaqynda vedomstvo ókilderi dombyrany ushaq bortynda alyp júrýge ruqsat etilýi múmkin ekenin habarlaǵan edi.
