Dombyrany ushaq bortynda alyp júrý úshin júk tasymaldaý sharttary ózgerýi múmkin

ASTANA. KAZINFORM – Kólik mınıstrligi áýe kompanııalarymen birlesip, dombyrany ushaq bortynda alyp júrý máselesin talqylap jatyr. Bul týraly Kólik vıtse-mınıstri Sátjan Ablalıev Májiliste aıtty. 

«Ózderińiz bilesizder, áýe kompanııalary bortqa qazaqtyń qasıetti qara dombyrasyn kirgizbeıdi. Bul bizdiń ulttyq namysymyzdy qorlaý dep túsinemiz. Qazaqtyń qasıetti dombyrasy qatardaǵy júk emes. Bizdiń ulttyq qundylyǵymyz. Búgingi tańda qasıetti dombyraǵa qalaı bolsa solaı qaraý bizdiń ulttyq namysymyzǵa tıedi. Sondyqtan ábden taırańdap ketken áýe kompanııalaryn qashan tártipke shaqyrasyzdar? Kıeli dombyrany árbir óner ókili ózimen alyp kirýi kerek dep oılaımyn», - dedi Májilis depýtaty Amanjol Áltaı.

Óz jaýabynda Kólik vıtse-mınıstri Sátjan Ablalıev áýe kemelerinde mýzykalyq aspaptardy tasý olardyń gabarıtterine baılanysty ekenin taǵy da eske saldy.

«Keıbir aspaptardy qazirgi áýe kemeleriniń sóresine ornalastyrý múmkindigi joq. Soǵan baılanysty osyndaı suraqtar týyndap jatyr. Qazirgi ýaqytta áýe kompanııalarymen birlesip, osy sharýany sheshý boıynsha tıisti jumystar júrgizilip jatyr. Kerek bolǵan jaǵdaıda jol júgin, qol júgin tasymaldaý sharttaryna ózgerister engizýge daıyndalyp jatyrmyz. Barynsha osy máseleni áýe kemeleriniń múmkindikterine baılanysty sheshýge tyrysyp jatyrmyz», - dedi S. Ablalıev.

Eske salsaq, byltyr aıtysker aqyn Aısholpan Tileýtaı Fly Arystan ushaǵyna dombyrasyn alyp kirýge ruqsat berilmegenin áleýmettik jelidegi paraqshasynda jazǵan edi. Keıin Májilis depýtaty ushaqtarǵa ulttyq aspaptardy kirgizbeýge qatysty áýe kompanııalarynyń áreketin synǵa aldy.

Buǵan deıin Air Astana kompanııasynyń vıtse-prezıdenti Aleksandr Neboga ushaq ishindegi qol júgi jáshikterine keıbir zattardy salý múmkin emes ekenin aıtty.