Dombyrany haram degen aqtóbelik bas bostandyǵynan aıyryldy
AQTÓBE. KAZINFORM - Sottalýshy Azat Qonys Qylmystyq kodekstiń «Dinı alaýyzdyqty qozdyrý» baby boıynsha aıypty dep tanyldy. Jazasyn qaýipsizdigi ortasha túzetý mekemesinde óteıdi.
Aqtóbe qalalyq sotynda 35 jastaǵy sottalýshy Azat Qonysqa qatysty qylmystyq is qaraldy. Oǵan Qylmystyq kodekstiń 174-baby 1-bóligi boıynsha aıyp taǵyldy. Jaryssóz kezinde prokýror sottalýshynyń qoǵam úshin qaýipti oı aıtqanyn, dinı, ulttyq alaýyzdyqty qozdyrǵanyn aıtyp, 3 jyl 6 aıǵa bas bostandyǵynan aıyrýdy surady.
- Tikeleı efır kezinde ulttyq, dinı alaýyzdyqty qozdyrý maqsatynda qazaqtyń eki ishekti aspaby dombyrany er adamnyń múshesine teńedi. Sonymen birge A.Qonys tikeleı efır kezinde Tıktok áleýmettik jelisi arqyly Qazaqstan musylmandary dinı basqarmasyn «tozaqtyń ıtteri» dep atap, janýarǵa teńedi. A.Qonys Qylmystyq kodekstiń 174-baby 1-tarmaǵy boıynsha quqyqbuzýshylyq jasady. Sot talqylaýy kezinde sottalýshy ózine taǵylǵan aıypty tolyq moıyndady,- dedi prokýror Madına Tasmaǵambetova.
Sot jaryssózinde sottalýshy Azat Qonys ózine taǵylǵan aıypty moıyndady.
- Men óz isime ókinemin. Tikeleı efır kezinde «dombyra - ibilistiń múshesi», «dinı basqarma ımamdary - tozaqtyń ıtteri» dep aıtqanymdy moıyndaımyn. Bárinen, qazaq elinen keshirim suraımyn. Bas bostandyǵynan aıyrmaýdy, tek shekteý jazasyn berýdi suraımyn,- dedi sottalýshy jaryssózde jáne sońǵy sózinde.
Sot sottalýshy Azat Qonysqa bas bostandyǵynan aıyrý jazasyn taǵaıyndady.
- Azat Qonys Qylmystyq kodekstiń 174-baby 1-bóligimen aıypty dep talynyp, 3 jyl 6 aıǵa bas bostandyǵynan aıyrylsyn. Jazasyn qaýipsizdigi ortasha túzetý mekemesinde ótesin, - dedi sýdıa J.Qaıboldın.
Eske salsaq, áleýmettik jelidegi vıdeodan soń sottalýshynyń jeke basy anyqtalyp, ustaldy. Birden ýaqytsha ustaý ızolıatoryna qamaldy.
