Dombyrany haram degen aqtóbelik 7 jylǵa deıin bas bostandyǵynan aıyrylýy múmkin
AQTÓBE. KAZINFORM — Azat Qonys Qylmystyq kodekstiń «Dinı alaýyzdyqty qozdyrý» baby boıynsha kúdikke ilikti. Tergeý aıaqtalǵansha qamaýda otyrady.
Aqtóbe oblystyq PD baspasóz qyzmetiniń habarlaýynsha, kúdikti áleýmettik jelilerde dinı negizdegi arazdyq pen óshpendilikti qozdyrýǵa baǵyttalǵan pikir jarııalaǵan. Jedel-izdestirý barysynda onyń jeke basy anyqtalyp, ustaldy.
— Birden ýaqytsha ustaý ızolıatoryna qamaldy. Sot sanktsııasymen oǵan bultartpaý sharasy retinde qamaýda ustaý túri tańdaldy. Jergilikti turǵynǵa qatysty dinı arazdyqty qozdyrý faktisi boıynsha qylmystyq is qozǵaldy. Qylmystyq is boıynsha sotqa deıingi tergep-tekserý amaldary júrgizilip jatyr. Oqıǵanyń barlyq mán-jaıy anyqtalady. Polıtsııa áleýmettik, ulttyq, rýlyq, násildiknemese dinı arazdyqty qozdyrý zańmen qatań jaýapkershilikke ákeletinin eskertedi, — dep habarlady Aqtóbe oblystyq PD baspasóz qyzmeti.
Aıta keteıik, Azat Qonys áleýmettik jelide ishiktik aspaptar, onyń ishinde dombyrany da haram dep aıtqan. Vıdeo áleýmettik jelide talqyǵa túsip, polıtsııa is qozǵady.
Eske salsaq, QMDB Sharıǵat jáne pátýa bólimi eki jyl buryn dombyra tartý týraly pátýa shyǵardy.
Onda: «Dindi nasıhattaıtyn, halyqty otansúıgishtikke, ımandylyqqa, birlik pen adamgershilikke shaqyratyn ánder men mýzykaǵa ruqsat. Eger mýzyka pasyqtyqqa, buzǵynshylyqqa, jamanshylyqqa, azǵyndyqqa, t. s. s. sharıǵatymyzda tyıym salynǵan isterge alyp barsa tyıym salynady. San ǵasyrdan beri Islam dinin ustanyp kele jatqan qazaq halqynyń ulttyq aspaby — dombyra arqyly án, terme-tolǵaý shyrqap, tyńdaýshyny ımandylyqqa, izgilikke, adamgershilikke, Otandy qorǵaýǵa, ata-anamyzdy qadirleýge shaqyrǵan. Sondyqtan dombyrany tartýǵa bolady», — dep aıtyldy.
