Dombyra men qobyzdy ushaq salonyna alyp kirýge ruqsat etilýi múmkin
ASTANA. KAZINFORM – Kólik mınıstrligi áýe kóligimen jolaýshylardy, bagajdy jáne júkterdi tasymaldaý qaǵıdalaryna ózgerister engizýdi usyndy. Túzetýler jolaýshylardyń quqyqtaryn qorǵaýdy kúsheıtýge jáne áýe tasymaly qyzmetteriniń sapasyn arttyrýǵa baǵyttalǵan, dep habarlaıdy Kólik mınıstrligi.
Mınıstrlik málimetinshe, ózgerister 2015 jylǵy 30 sáýirdegi №540 buıryqpen bekitilgen Áýe kóligimen jolaýshylardy, bagajdy jáne júkterdi tasymaldaý qaǵıdalaryna engizilmek.
Jobaǵa sáıkes, mýzykalyq aspaptardy tasymaldaý tártibi naqtylanady. Belgilengen talaptar saqtalǵan jaǵdaıda olardy qol júgi retinde, jeke jolaýshy ornyna ornalastyryp nemese tirkelgen bagaj retinde tasymaldaýǵa múmkindik beriledi.
– Qorǵanysh qaptamasyna salynǵan mýzykalyq aspaptardy, onyń ishinde dombyra men qobyzdy ushaq salonynda tasymaldaýǵa ruqsat berý usynylady. Bul rette olardyń ólshemi 110×35×30 santımetrden, al salmaǵy 10 keliden aspaýǵa tıis, – delingen mınıstrlik habarlamasynda.
Sonymen qatar áýe kompanııalarynyń talaptaryna sáıkes janýarlardy ushaq salonynda tasymaldaýǵa múmkindik berý, sondaı-aq múgedektigi bar jolaýshylarǵa áýe tasymaly kezinde jeńildikter berý normasyn zańnamalyq deńgeıde bekitý usynylǵan.
Jobaǵa áýe kemesi syıymdylyǵy tómen basqa ushaqqa aýystyrylǵan jaǵdaıda jolaýshylardy ornalastyrýdyń basym tártibi de engizilgen. Mundaı jaǵdaıda birinshi kezekte kámeletke tolmaǵandar, múgedektigi bar adamdar, aýyr naýqastar, júkti áıelder jáne zeınet jasyndaǵy azamattar tasymaldanady.
– Sondaı-aq jolaýshyny jetkizý keshikken jaǵdaıda tólenetin aıyppuldy óteýdiń naqty merzimin belgileý usynylyp otyr. Tıisti ótinish berilgen kúnnen bastap tólem 10 kúntizbelik kúnnen keshiktirilmeı júrgizilýi tıis. Budan bólek, tasymaldaýshynyń kinási dáleldense, tirkelmegen qol júginiń búlinýine baılanysty áýe kompanııalarynyń jaýapkershiligin belgileý kózdelgen, – dep málimdedi mınıstrlik.
Qujat jobasy qoǵamdyq talqylaý úshin «Ashyq NQA» ınternet-portalynda jarııalanǵan.
Aıta keteıik, jyl aıaǵyna deıin eldegi áýe kompanııalary jańa 6 ushaq alady.
