Dombyra kúni: el kóleminde 300-ge jýyq is-shara uıymdastyrylady

ASTANA. KAZINFORM – Qazaqstanda jyl saıyn shilde aıynyń alǵashqy jeksenbisinde Ulttyq Dombyra kúni atap ótiledi. Bıyl bul mereke 6 shildede toılanbaq. 

2018 jyly Prezıdenttiń bastamasymen bekitilgen bul mereke ulttyq biregeılikti nyǵaıtýǵa, jastardyń dástúrli mádenıetke qyzyǵýshylyǵyn oıatýǵa jáne urpaqtar sabaqtastyǵyn nasıhattaýǵa baǵyttalǵan.

Mádenıet jáne aqparat mınıstrligi osy kúnge oraı respýblıkalyq is-sharalar josparyn bekitti.

Mádenıet jáne aqparat mınıstrliginiń baspasóz qyzmetiniń málimetinshe bıyl el kóleminde 300-ge jýyq is-shara uıymdastyrylady, onyń 200-den astamy óńirlerde josparlanǵan.

— 6 shilde kúni Almaty qalasyndaǵy MEGA Alma-Ata ashyq alańynda Qurmanǵazy atyndaǵy Qazaq ulttyq halyq aspaptary orkestriniń merekelik kontserti ótedi. Sonymen qatar Kóktóbe saıabaǵynyń alańynda «Dombyra party» atty saltanatty kontsert uıymdastyrylady.

Astanadaǵy amfıteatr alańynda Ulttyq Dombyra kúnine arnalǵan merekelik kontsert ótedi. Ulttyq mýzeıde kórnekti kompozıtor Nurǵısa Tilendıevtiń 100 jyldyǵyna arnalǵan kontsert uıymdastyrylady.

Jambyl oblysynda, «Kóne Taraz» arheologııalyq saıabaǵy aýmaǵynda «Ulttyq dombyra kúni — baba únine qurmet» atty mýzykalyq kesh ótedi.

Túrkistanda, «Áziret Sultan» tarıhı-mádenı mýzeı-qoryǵynyń alańynda «Dombyra — dastan» atty mádenı-kópshilik is-shara uıymdastyrylady, — delingen habarlamada.

Sonymen qatar, elimizde Dombyra kúnine oraı chellendj ótip jatyr, oǵan 100-ge jýyq mádenıet salasynyń kórnekti ókili qatysyp jatyr.

Aıta ketelik ulttyq dombyra kúnine oraı polıtsııa qyzmetkerleri Medeý muz aıdynynda kúı shertken edi.