Dombyra, qyzǵaldaq, #Qazaqstan - Jalpyulttyq nyshandardyń tizimi jasaldy

ASTANA. KAZINFORM — Búgin Prezıdent Qasym-Jomart Toqaev «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly» Jarlyqqa qol qoıǵan edi. Eldiń tarıhı-mádenı erekshelikterin aıqyndaıtyn ulttyq nyshandardyń tizimi jasaldy, bul álemde keńinen qoldanylatyn tájirıbe. 

Ulttyq nyshandar eldiń ózine tán ereksheligin tanýǵa, jalpyulttyq biregeıligimizdi nyǵaıtýǵa jáne tarıhı-mádenı muramyzdy saqtaýǵa yqpal etedi.

Osy maqsatta jalpyulttyq nyshandardyń mynadaı tizimi aıqyndalady:

ulttyq uran – «Alǵa, Qazaqstan!»;

ulttyq túster – aspan tústes kók, altyn sary tús;

ulttyq kitap nyshany – Abaıdyń «Qara sózderi»;

ulttyq birlik nyshany – shańyraq;

ulttyq mýzykalyq aspap nyshany – dombyra;

ulttyq ósimdik nyshany – qyzǵaldaq;

otandyq ónim shyǵarýdyń ulttyq belgisi – «Qazaqstanda jasalǵan», «Made in Qazaqstan»;

ulttyq heshteg – #Qazaqstan, #Kazakhstan.

Jalpyulttyq nyshandardyń osy tizimi eldiń biryńǵaı nyshandar júıesin jáne brendin qalyptastyrady.

Ulttyq nyshandar jalpyulttyq aıdentıkanyń, atap aıtqanda, memlekettik organdardyń, ákimshilik-aýmaqtyq birlikterdiń, bilim berý, mádenıet jáne sport mekemeleriniń, azamattyq qoǵam ınstıtýttarynyń bazalyq elementterine aınalýǵa tıis.

Ulttyq nyshandar saltanatty rásimderdi, qoǵamdyq-saıası, gýmanıtarlyq, mádenı-buqaralyq is-sharalardy ótkizý barysynda qoldanylýy múmkin.