Dombyra, baýyrsaq jáne shashý: 33 jyldan keıin Arqalyqqa áýe reısteri qaıta jandandy
ARQALYQ. KAZINFORM – Astanadan Arqalyqqa 33 jyldan keıingi birinshi turaqty áýe reısi oryndalyp, aıtýly oqıǵa ushaq kókke kóterilmeı jatyp-aq úlken merekege ulasty. Jolaýshylardy dombyranyń kúmbirlegen únimen, áýezdi ánmen shyǵaryp salyp, ystyq baýyrsaq usynyldy. Al Arqalyqta áýe kemesin shashýmen qarsy aldy.
Áýe qatynasynyń qaıta jandanýy Torǵaı óńiri úshin mańyzdy ınfraqurylymdyq jobalardyń birine aınaldy. Buǵan deıin Qostanaı oblysynyń ákimi Qumar Aqsaqalov Arqalyq áýejaıyn qalpyna keltirýdiń óńirdi damytý jáne onyń kólik qoljetimdiligin arttyrý úshin strategııalyq mańyzy bar ekenin atap ótken bolatyn.
— Arqalyq áýejaıyn qaıta jańǵyrtý jáne tikeleı áýe reısterin iske qosý — bul Prezıdent tapsyrmalaryn naqty júzege asyrý. Memleket basshysy monoqalalardy damytýǵa erekshe kóńil bóledi. Osy jumys aıasynda jańa jolaýshylar termınaly jáne qajetti barlyq ınfraqurylym salyndy, — dedi Qostanaı oblysy ákiminiń orynbasary Berik Tańjaryqov.
Áýejaı Prezıdenttiń Ulttyq quryltaıdyń IV otyrysynda bergen tapsyrmasyna sáıkes qalpyna keltirildi.
Sertıfıkattaý rásimderinen keıin áýe aılaǵy CRJ200 úlgisindegi óńirlik ushaqtardy qabyldaýǵa ruqsat aldy. Endi Arqalyqtan Astana, Almaty jáne Qostanaı baǵyttaryna úsh turaqty reıs ashyldy. Reıster aptasyna eki ret — seısenbi jáne senbi kúnderi oryndalady. Áýe tasymaldaýshysy — SCAT áýe kompanııasy.
Bul kúni jolaýshylardyń qýanyshy da erekshe sezildi. Astanada shyǵaryp salý kezindegi merekelik kóńil-kúı áýede de jalǵasty. Ushaq bortynda Torǵaı óńirine arnalǵan Shámshi Qaldaıaqov pen Muhtar Shahanovtyń «Arqalyqtyń aq tańy» áni shyrqaldy. Al ushaq Arqalyqta qonǵannan keıin mereke odan ary ulasty. Birinshi áýe kemesin jergilikti turǵyndar shashý shashyp, mýzykamen, ánmen qarsy aldy. Kóptegen turǵyn úshin reısterdiń qaıta ashylýy eń aldymen jaqyndaryna tezirek jetip, olarmen jıi qaýyshýǵa múmkindik beretin mańyzdy jańalyq boldy.
— Shyndyǵynda da bul biz úshin kópten kútken oqıǵa. Endi týǵan-týystarymyzǵa tezirek baryp, olarmen jıi kezdesetin bolamyz. Qala turǵyndary úshin áýejaıdyń ashylýy — úlken qýanysh, — dedi Arqalyq turǵyny Janar Kaýmetova.
Osylaısha, tańerteń Astanadan dombyranyń únimen saparǵa attanǵan jolaýshylardy Arqalyq dástúrli shashýmen qarsy aldy. 33 jyldan keıin Arqalyq qaıtadan elimizdiń turaqty áýe qatynasy kartasyna endi.
