«Dollarsyzdandyrý» ekonomıkanyń turaqty ósimine ákeledi
ALMATY. QazAqparat - «Dollarsyzdandyrý» ekonomıkanyń turaqty ósimine ákeledi. Bul týraly QazAqparat tilshisine Qazaqstan Brıtan tehnıkalyq ýnıversıteti Bıznes mektebiniń professory, ekonomıka ǵylymdarynyń doktory Nurlan Nurseıit óz pikirin bildirdi.
«Dollarsyzdandyrý» halyq arasynda teńgeniń bedelin arttyrý úshin jasalyp jatyr. Eger ol sátti júzege assa, Ulttyq bank - teńge emıssııasynyń qosymsha múmkindigine, bankter - arzan teńge resýrstaryna, kásiporyndar salystyrmaly túrde arzan nesıege qol jetkizedi. Qarapaıym halyqqa basty tıimdiligi, ulttyq valıýta kýrsy nyǵaıa túsedi. Іshki naryqta shetel valıýtasyn paıdalaný qajettiligi azaıady. Bul valıýtalyq táýekelderdiń aldyn alýǵa kómektesedi. Óz kezeginde ol ulttyq ekonomıkanyń turaqty ósimine ákeledi», - dedi Nurlan Nurseıit.
Mamannyń pikirinshe, dollarsyzdandyrý turaqty ekonomıkalyq ósimge negizdelmese, ınvestorlarǵa senim týǵyzbaıdy.
«Bizde ekonomıkalyq ósimniń negizgi draıveri munaı bolsa, ol baǵanyń quldyraýyna baılanysty bul fýnktsııany atqarýdy doǵardy. Al, basqa draıverdi men ázirge kórip turǵan joqpyn. Osyndaı jaǵdaıda dollarsyzdandyrý ákimshilik resýrstarǵa negizdeledi. Al, qanshalyqty tıimdi bolady, ony ýaqyt kórsetedi», -dep qorytyndylady ol.
Sonymen qatar, sarapshy ózge eldermen saýda jasaýdy ulttyq valıýtaǵa kóshirýge qatysty óz oıyn bildire ketti. Onyń oıynsha mundaı qadam dollarǵa degen suranysty azaıtady.
«Men ony quptaımyn. Ol ulttyq valıýtalarǵa degen suranysty arttyrady. Bul Eýropalyq Odaq elderiniń arasynda basynda úlken tıimdiligin kórsetti. Biraq, ol shara ózara bir-birin tolyqtyratyn elderde, ekonomıkalyq ósimi bir dárejedegi elderde múmkin. Sondyqtan, bul jaǵdaıda Kedendik Odaq elderi arasyndaǵy óndiristik kooperatsııa, ózara tyǵyz yntymaqtastyq túıtkildiń sheshimi bola alady», - dep qorytyndylady ol.
