Dollardyń quny Pavlodar oblysynda sharyqtap tur
ALMATY. Qazaqparat. 13 aqpanda Respýblıka boıynsha AQSh dollaryn teńgege satýdyń eń joǵary baǵamy Pavlodar oblysynda (187 KZT/USD), eýro boıynsha Shyǵys Qazaqstan oblysynda (260 KZT/EUR) tirkeldi.
Bul jóninde QR Ulttyq Bankiniń Tóraǵasy Q.N. Kelimbetovtiń tóraǵalyǵymen ótken selektorlyq keńeste málim boldy. Otyrysta QR Ulttyq Banki aýmaqtyq fılıaldary dırektorlary Qazaqstannyń óńirleri boıynsha júrgiziletin monıtorıngtiń barysy men nátıjelerin talqyǵa saldy. 2014 jylǵy 13 aqpandaǵy saǵat 11:00-degi jaǵdaı boıynsha aıyrbastaý pýnktteriniń negizgi aınalymyn qamtamasyz etetin valıýtalar - AQSh dollary men eýro baǵamdarynyń ahýaly negizinen qalpyna keldi. Teńgege AQSh dollaryn satyp alý jáne satý baǵamdaryn aıyrbastaý pýnktteri QR Ulttyq Banki ishki valıýta naryǵyndaǵy operatsııalar úshin málimdegen dáliz sheginde belgileýde. Búkil óńirlerdiń aıyrbastaý pýnktterinde AQSh dollary boıynsha satyp alý baǵamy men satý baǵamy arasyndaǵy aıyrma 2 teńgeden, al eýro boıynsha 3 teńgeden aspaıdy. Aıyrbastaý pýnktteriniń úzdiksiz jumys isteýin jáne olardyń halyqpen júrgiziletin operatsııalarda alypsatarlyǵyna jol bermeý maqsatynda QR Ulttyq Banki jáne onyń aýmaqtyq fılıaldary qolma-qol shetel valıýtasynyń ishki naryǵyndaǵy ahýaldyń monıtorıngin turaqty túrde júzege asyryp otyr. QR Ulttyq Bankiniń aýmaqtyq fılıaldarynda «jedel jeliler» ashyldy, onda azamattar aıyrbastaý pýnktteri jumysynyń buzylýy anyqtalǵan kezde shaǵymdana alady. Jeke tulǵanyń aıyrbastaý pýnktteri jumysy boıynsha shaǵymynyń bolýy jospardan tys tekserý júrgizý úshin negiz bolyp tabylady, QR Ulttyq Bankiniń tıisti aýmaqtyq fılıalyna jiberilgen shaǵymnyń nysany mindetti túrde árbir aıyrbastaý pýnktinde bolady.
