Dollardyń eshqandaı quny qalmady – sarapshy pikiri
ASTANA. 2 naýryz. QazAqparat - Esimi elge belgili saýdııalyq bıznesmen ári Jıddanyń saýda-ónerkásip palatasynyń tóraǵasy Saleh Kamel álemniń qarjy-nesıe júıesin synǵa aldy. Bul jaıynda Ahram basylymy habar taratty.
Kemaldyń sózine qaraǵanda, valıýtanyń altyn men kúmiske baılanysy úzilgen sátten bastap bul júıe qabiletsiz kúıge ushyraǵan. Onyń aıtýynsha, dollardyń eshqandaı quny qalmady. Dollarsyz kúnimiz qarań, dollar baǵamynyń quldyraýynan qorqyp, ómir súremiz. Altyn men kúmiske «qosaqtamasa» valıýta tek AQSh-tyń qýatyn ǵana tanytatyn jaı qaǵaz bolyp qalady.
muslim.kz saıtynyń jazýynsha, sonymen qatar, ol Dúnıejúzilik bankti de syn sadaǵyna aldy. Onyń pikiri boıynsha, atalmysh bank arabtardyń jáne Afrıkanyń damýshy elderine óz degenin istetip, bir shybyqpen jýsatyp-órgizip otyr. Al qaryzy bastan asyp jatqan, ekonomıkasy «aýrý» AQSh pen Eýropa elderine kózin jumyp qaraıdy.
Sarapshy munymen ǵana toqtamaı, Parsy shyǵanaǵy elderiniń ortalyq bankin qurý ıdeıasyn da quptamady. Onyń óz betinshe sheshim qabyldap, derbes jumys isteıtinine kúmán keltirdi. «Ortaq bank ary ketkende úılestirý qyzmetimen ǵana aınalysady»,- dep sanaıdy. Buǵan qosa, eýroǵa qatysty kózqarasyn bildire kele «tek jarym-jartylaı sátti júzege asqan joba», dep bir-aq kesti. Qazirgi arab elderi ekonomıkasynyń eýropalyq ekonomıkadan bálendeı aıyrmashylyǵy joq ekenin de tilge tıek etti.
