Dollardy qabyldamasa ne isteý kerek: Ulttyq bank túsinikteme berip ótti
ASTANA. KAZINFORM – Qoldanýǵa jaramsyz shetel valıýtasynyń banknotalaryn satyp alý jáne satý tártibi qandaı. Bul týraly Ulttyq bank túsindirip ótti.
Qazaqstan Ulttyq banki turǵyndar tarapynan jıi túsip jatqan ótinishterge baılanysty el aýmaǵynda qolma-qol shetel valıýtasymen aıyrbastaý operatsııalaryn júzege asyrý tártibin, sonyń ishinde banknotalardy aınalymǵa jaramdy dep taný qaǵıdalary men aıyrbastaýdan negizsiz bas tartylǵan jaǵdaıda áreket etý tártibin túsindiredi.
Aıyrbastaý operatsııalaryn júzege asyrý qaǵıdalaryna sáıkes:
— tıisti emıtent-eldiń aýmaǵynda zańdy qolma-qol tólem quraly sanalatyn;
— emıtent eldiń anyqtamalyq materıaldarynda kórsetilgen tolyq sıpattamaǵa sáıkes keletin sheteldik valıýtadaǵy banknotalar zańdy tólem quraly túrinde aınalymǵa jaramdy dep tanylady.
Tólemge qabiletsiz jáne qoldanýǵa jaramsyz shetel valıýtasynyń banknotalaryn satyp alý jáne satý tártibi
— Tıisti shet memlekettiń emıtent-banki aınalymnan shyǵarǵan jaǵdaıda, sheteldik valıýta banknotalary — tólemge qabiletsiz, al jyrtylǵan, búlingen jáne basqa da mini bolsa — jaramsyz dep tanylady. Ondaı belgilerdiń tolyq tizbesi QUB saıtynda bar. Mundaı banknotalardy ınkassalyq operatsııa júrgizýge sheteldik banktermen shart jasasqan ýákiletti bankter ǵana satyp alady jáne aýystyrady. Mundaı operatsııalardyń komıssııasy nomınaldy qunynyń 10%-nan aspaýǵa tıis. Bul rette klıent ınkasso sharty kórsetilgen jazbasha kelisimge qol qoıady jáne oǵan emıtent-bank (sheteldik bank) aıyrbastaýdan bas tartýy múmkin ekeni týraly eskretiledi, — delingen Ulttyq bank habarlamasynda.
Aınalymǵa jaramdy sheteldik valıýta banknotalaryn satyp alý jáne satý kezinde negizsiz bas tartý jaǵdaıyndaǵy is-qımyl tártibi
Eger aınalymǵa jaramdy bolsa, qolma-qol shetel valıýtasynyń nomınaly men shyǵarý jylyna shekteý bolmaıdy.
Jeke tulǵanyń qolynda sheteldik jáne ulttyq valıýtada qajet somasy bolǵan jaǵdaıda, aıyrbastaý pýnkti myna jaǵdaılardy esepke almaǵanda, valıýta aıyrbastaýdan bas tartýǵa quqyly emes:
— KJTQQ týraly zań talaptarynda kózdelgen sharalar qoldanylǵanda;
— jeke basyn kýálandyratyn qujatty nemese tsıfrlyq qujat servısi arqyly jeke basyn rastaıtyn derekti usynbaǵanda.
Aıyrbastaý operatsııasynan negizsiz bas tartylǵan jaǵdaıda azamattar aıyrbastaý pýnkti ornalasqan jerdegi Ulttyq banktiń aýmaqtyq fılıalyna shaǵym túsirýge quqyly. Shaǵymda bas tartý sebebi tolyq kórsetilip, zań talabyna saı tıisti shara qabyldaý úshin qolda bar qujat qosa berilgeni jón.
QUB aýmaqtyq fılıaldarynyń baılanys derekteri týraly aqparatty QUB resmı ınternet-resýrsynan tabýǵa bolady.
Aıta ketelik Ulttyq banktiń Qarjylyq turaqtylyq jáne zertteýler departamenti Zeınetaqy jınaqtaryn merziminen buryn paıdalaný baǵdarlamasynyń jyljymaıtyn múlik naryǵyndaǵy baǵalarǵa áseri týraly zertteý qorytyndysyn jarııalaǵan edi.