Dollar nege qymbattap jatyr - qarjyger sebebin túsindirdi
Sarapshynyń aıtýynsha, teńgeniń quldyrap, dollardyń nyǵaıýyna birneshe sebep bar.
«AQSh aqshasynyń qymbattaýyna úsh negizgi sebep bar. Eń bastysy, bul bıýdjettik túzetý. Óıtkeni, bizde dástúr boıynsha bıýdjet tamyz aıynda qaralady. Úkimet bizdiń jalaqyny, zeınetaqyny kótergisi keledi. Ekinshi sebep. Bul halyqtyń ózi dollardyń qymbattaýyn kútkeni. Shynynda da, qazir teńge baǵamynyń tómendeýi rýbldiń turaqty valıýtalarǵa qatysty álsireýimen tuspa-tus keldi. Reseı - bizdiń saýda-satyq salasyndaǵy áriptesimiz. Reseıde dollardyń qymbattaýy kórshi eldegi ınflıatsııanyń ósýin bildiredi. Álbette, munyń bári bizge sózsiz áser etedi»,- dedi qarjyger.
Budan bólek, elge reseılik taýarlar kirdi degen boljam bar. Kórshi el taýarlary Qazaqstandaǵy rýblge beıimdelýi kerek. Sondyqtan saýda jelileri qaıta qurylady. Oǵan eki aıdaı ýaqyt ketedi.
«Úshinshiden, kúzge qaraı iri kompanııalar qaryzdaryn óteı bastaıdy. (Oblıgatsııa tólemderi taǵy basqalary). Sondyqtan olar rýbl kúrt arzandaǵan sátti tıimdi paıdalanbaq. Olar teńge de quldyraıdy degen boljam jasap, dollar satyp alady. Osy 3-4 derek sáıkes kelip tur. Tórtinshi faktor. Úkimet kvazımemlekettik sektordyń ulttyq kompanııalary qor bırjasy arqyly satýy tıis mindetti valıýtalyq túsimderdiń úlesin azaıtqysy keledi. Osylaısha, Úkimet bıýdjet qarjysyn arttyrǵysy keledi. Teńge – jumsaq valıýta»,- dedi Rasýl Rysmambetov.
Aıta keteıik, keshe Qor naryǵynda dollar baǵamy kúrt kóterildi. Qazir aqsha aıyrbastaý oryndarynda dollar 462- 468 teńgeden saýdalanyp jatyr.
