Dollar baǵamynyń qaıta eseptelýine baılanysty bıyl jan basyna shaqqandaǵy JІÓ 6,9 myń dollarǵa boljandy - E. Dosaev
ASTANA. QazAqparat - Dollar baǵamynyń qaıta eseptelýine baılanysty bıyl jan basyna shaqqandaǵy JІÓ 6,9 myń dollarǵa boljandy. Búgin «2016-2018 jyldarǵa arnalǵan respýblıkalyq bıýdjet týraly» Zańyna ózgerister men tolyqtyrýlar engizý týraly» zań jobasyn tanystyrylymy barysynda Ulttyq ekonomıka mınıstri Erbolat Dosaev osylaı málim etti.
Mınıstrdiń aıtýynsha, Úkimet túzetken makroekonomıkalyq kórsetkishterge sáıkes, AQSh dollarynyń esep aıyrysý baǵamy 300 teńgeden 360 teńgege aýystyrylady.
«Álemdik naryqtaǵy aǵymdaǵy úderis boıynsha 2016 jyly álemdik munaı baǵasy barreline 30 dollarǵa, al metall baǵasy byltyrǵy jylǵa qaraǵanda 15 paıyz tómen deńgeıde boljanady. Munaı men metalǵa jańartylǵan stsenarıı boıynsha, sonymen qatar, ekonomıkalyq belsendilikti yntalandyrý boıynsha daǵdarysqa qarsy jedel aldyn ala sharalaryna oraı 2016 jyly JІÓ ósimi 0,5 paıyzdy quramaq. Atap aıtqanda, bıyl nomınaldy JІÓ 44 166,5 mlrd. teńge shamasynda boljanady, bul 2015 jyldyń qarashasynda maquldanǵan kórsetekishke qaraǵanda 1 364,0 mlrd. teńgege tómen», - dedi E. Dosaev.
Onyń aıtýynsha, 2016 jyly halyqtyń jan basyna shaqqandaǵy JІÓ 6,9 myń dollarǵa boljanady. «Bul buǵan deıingi kórsetkishten 1,6 dollarǵa tómen jáne negizinen dollardyń teńgege qatysty baǵamnyń ózgerisine qaraı eseptelip otyr», - dedi E. Dosaev.
