Dollar 600 teńgege deıin qymbattaýy múmkin be – Nurlan Baıbazarovtyń jaýaby

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Nurlan Baıbazarov Úkimet otyrysynan keıin ótken baspasóz máslıhatynda teńgeniń dollarǵa shaqqandaǵy baǵamy týraly pikir bildirdi.

«Úkimette ekonomıkanyń kórsetkishterin boljamdap josparlaǵan kezde biz ortasha baǵamdy belgilegen bolatynbyz. Bıylǵy josparlaǵan, bekitilgen dollardyń jyldyq baǵamy – 460 teńge. Qazir biz bul boljamdy ózgertken joqpyz. Jalpy jyldyń dınamıkasyn alyp qarasaq, ortasha eseppen 460 teńgege jaqyndap qaldyq. Bul óte mańyzdy. Osy ortasha deńgeıde bolyp jatqan baǵamnyń qozǵalys dınamıkasyn qarasaq, qazir sol 460 teńgege shyǵyp otyrmyz. Sondyqtan, bizdiń boljam jyldyń aıaǵyna deıin ózgermeıdi», - dedi vıtse-premer.

Sondaı-aq, ol Úkimet teńge baǵamyn jiti baqylaýda ustap otyrǵanyn aıtty.

«Tımýr Muratuly (Súleımenov -red) keshe Ulttyq bank basshysy retinde pikirin aıtty. Dollar baǵamy naryqta belgilenedi. Suranys pen usynystyń ara-qatynasyna baılanysty. Sondyqtan qazirgi aıtylǵan jospar boıynsha jyldyń aıaǵyna deıin Ulttyq qordan qalǵan transfertter keledi. Onyń bári árıne, osy baǵamnyń sharyqtap ketpeýine oń áserin tıgizedi», - dedi Nurlan Baıbazarov.

Ulttyq bank tóraǵasy osyǵan deıin jyl basynan beri teńge baǵamy 5,8% álsiregeni týraly aıtqan bolatyn.