Doktrına sózimen tek memlekettik ınstıtýttar ǵana emes, Qazaqstan halqy men adamdary da sóıleıdi - bolgarııalyq sarapshy

sp;ASTANA. Jeltoqsannyń 8-i. QazAqparat - Qazaqstan Respýblıkasynyń Bolgarııadaǵy Elshiliginiń baspasóz qyzmeti Qazaqstan Respýblıkasyndaǵy el birligi doktrınasyna saıasattaný ǵylymynyń doktory, Klıment Ohrıdskıı atyndaǵy Sofııa ýnıversıtetiniń (Bolgarııa) jáne Karlos Tersero de atyndaǵy Madrıd ýnıversıtetiniń (Ispanııa) oqytýshysy Tatıana Dronzınanyń pikirin usynady.

               ***
Qazirgi jahandanǵan álemde adamdar, elder jáne aımaqtar bir-birine barynsha táýeldi bola túsýde. Sondyqtan, bir eldegi demokratııa men turaqtylyqty nyǵaıtýǵa, sondaı-aq konfessııaaralyq jáne ulysaralyq kelisimdi jaqsartýǵa baǵyttalǵan kúsh-jiger tek ishki saıası ǵana emes, syrtqy saıası ólshemderge de ıe. Menińshe, Qazaqstan Respýblıkasyndaǵy El birligi doktrınasyn dál osyndaı uǵym turǵysynan qarastyrǵan jón.

Qazaqstandy qosa alǵanda, barlyq jańa memleketter úshin eń mańyzdy shaqyrýlar ulttyq qurylys bolyp tabylady. Oǵan tabysty jaýap halyqtyń saıası danalyǵy men kóregendigin, qoǵam tarapynan damý úrdisin dál túsinýdi, saıası elıtanyń ulttyq jáne jahandyq jaýapkershiligin tereń sezinýdi talap etedi. Men bulardyń barlyǵyn da Qazaqstan Respýblıkasyndaǵy El birligi doktrınasynan tapqanymdy úlken qanaǵattanarlyqpen aýyzǵa alamyn, qazaqstandyq ulttardyń jáne memlekettiń shoǵyrlanýy jolyndaǵy mańyzdy qadam dep baǵalaımyn.

Alaıda Qazaqstan Respýblıkasyndaǵy El birligi doktrınasyn tek ulysaralyq qatynastarǵa ǵana qatysty dep esepteý qate bolǵan bolar edi. Qazaqstandyqtardyń ózderiniń tózimdilikterimen jáne ózara túsinistikterimen maqtanýlaryna barlyq negiz bar. Ol el aýmaǵynda ómir súrip otyrǵan barlyq konfessııalyq jáne ulystyq toptardyń kúsh biriktirýiniń jáne tańdaýynyń nátıjesi bolyp tabylady. Qazaqstan Respýblıkasyndaǵy El birligi doktrınasy keń jáne tereń qaraýdy kórsetedi - bul bolashaq demokratııanyń, zańdardyń basqarýy men konstıtýtsıonalızmniń, adam quqyǵynyń múltiksiz saqtalýynyń jáne demokratııalyq saıası júıeniń odan ári damýynyń kórinisi.

Qazaqstan - konfessııalyq jáne ulystyq áralýandylyqty janjaldar men toqyraýǵa emes, damý men kelisimniń kózine aınaldyryp úlgergen at tóbelindeı ǵana elderdiń biri. Bul azamattyq demokratııalyq ultty tabysty qurýdyń úlgisi ǵana emes, aımaqtaǵy kúrdeli saıası jáne geosaıası qatynastardaǵy turaqtylyq faktory.

Búgingi kúni mynadaı suraq jıi kóldeneń tartylýda: ulystar men dinderdiń tatý qatar ómir súrýi múmkin be? Álemdegi sheshimin tappaǵan konfessııaaralyq jáne ulysaralyq janjaldardy týyndatatyn pessımızmniń ósip otyrǵan jaǵdaıynda, Qazaqstan Respýblıkasyndaǵy  El birligi doktrınasy atalmysh suraqqa biryńǵaı oń jaýap beredi. Onyń sózimen, ádette, resmı qujattar týraly sóz qozǵalǵanda tek memlekettik ınstıtýttar ǵana emes, ózderiniń ulystyq shyǵý teginiń jáne dininiń áralýandylyǵyna qaramastan ómir súrip otyrǵan Qazaqstan halqy men adamdary da sóıleıdi. Olar óz qoldarymen el basshylary senim artatyn jáne bolashaqqa senimmen qaraıtyn azamattyq demokratııalyq ultty qurǵanyn maqtan ete alady.