Doktorantýraǵa túsýshiler 26 shildede QAZTEST tapsyrady
ASTANA. KAZINFORM — QAZTEST-ke ótinish 22–24 shilde aralyǵynda qabyldanady, dep habarlaıdy QR ǴJBM Ulttyq testileý ortalyǵynyń baspasóz qyzmeti.
2026 jylǵy 26 shildede doktorantýraǵa túsýshi úmitkerler úshin elektrondy formattaǵy QAZTEST sertıfıkattyq testileýi Astana, Almaty, Shymkent, Aqtóbe, Aqtaý, Atyraý, Qaraǵandy, Qostanaı, Qyzylorda, Óskemen, Oral, Petropavl, Pavlodar, Semeı, Taraz, Túrkistan qalalarynda ótedi.
Ótinish 22-24 shilde aralyǵynda qabyldanady. Testileý 26 shilde kúnine belgilendi.
Ótinishter app.testcenter.kz saıtynda qabyldanady:
- saıtta tirkelińiz;
- «Ótinish berý» basyńyz;
- «Qazaq tilin bilý deńgeıin baǵalaý júıesi — QAZTEST» tańdańyz.
- «QAZTEST júıesi boıynsha sertıfıkattyq testileý» basyńyz.
QAZTEST júıesi boıynsha sertıfıkattyq testileý tórt bloktan turady:
Tyńdalym — 20 test tapsyrmasy (20 mınýt);
Oqylym — 40 test tapsyrmasy (50 mınýt);
Jazylym — 2 tapsyrma (50 mınýt);
Aıtylym — 2 tapsyrma (7 mınýt).
— Sertıfıkat alý úshin testilenýshi árbir blok boıynsha qajetti shekti baldy jınaýy tıis. Jazylym jáne aıtylym bloktary boıynsha testileýdiń nátıjeleri testileý aıaqtalǵan kúnnen keıin 15 jumys kúni ishinde app.testcenter.kz saıtyndaǵy testilenýshiniń jeke kabınetinde jarııalanady. Testileýge qatysý quny — 7 121 teńge, — delingen ortalyq taratqan habarlamada.
Buǵan deıin 3 shildede doktorantýraǵa túsý emtıhanyna (DTE) qatysýǵa ótinish qabyldaý bastalatynyn jazǵan edik.
