Doktorantýraǵa túsýge qujat qabyldaý búgin bastalady
ASTANA. KAZINFORM — 2024 jylǵy doktorantýraǵa túsý emtıhanyna ótinish qabyldaý testcenter.kz saıtynda 11 shildeden bastap 3 tamyzǵa deıin júrgiziledi.
Ótinish berý kezinde tek testileý ORNYN (QALASYN) tańdaı alasyzdar.
Al test tapsyrý kúni, ýaqyty jáne orny (mekenjaıy) týraly aqparat 9 tamyzda jeke kabınettiń «Meniń is-áreketim» bóliminde usynylady.
Aıta keteıik, sizderge ótinishterdi qabyldaý merzimi aıaqtalǵanǵa deıin, ıaǵnı 3 tamyzǵa deıin bilim berý baǵdarlamalarynyń tobyna, test tapsyrý tili men ornyna (qalasyna) ózgeris engizýge múmkindik beriledi.
Emtıhanǵa qatysý quny — 21 072 teńge.
TOEFL ITP sertıfıkaty bar tulǵalar DTE bastalǵanǵa deıin aǵylshyn tilin bilýge arnalǵan qosymsha testileýdi (qosymsha testileý) tapsyrady.
Qosymsha testileýdi ótkizý orny men ýaqyty týraly aqparat 5 tamyzda talapkerdiń jeke kabınetinde qoljetimdi bolady. Qosymsha testileýge qatysý quny — 14 162 teńge.
Túsýshiler mindetti túrde QAZTEST sertıfıkatyn jáne shet tilin meńgergenin rastaıtyn sertıfıkat usynýy kerek.
2024 jyly shet tilin meńgergenin rastaıtyn sertıfıkattardyń shekti deńgeıi B1-ge deıin tómendetildi jáne tizimge TOEIC jáne Duolingo English Test sertıfıkattary engizildi.
Doktorantýraǵa «magıstr» dárejesi jáne keminde 9 (toǵyz) aı eńbek ótili bar nemese medıtsına mamandyqtary boıynsha rezıdentýrada oqý bitirgen adamdar qabyldanady.
Memlekettik bilim berý tapsyrysy boıynsha jáne aqyly negizde doktorantýraǵa túsý úshin shekti ball — 75 ball.
2024 jyldan bastap túsýshilerdiń beıini boıynsha doktorlar baǵdarlamasy aıasynda doktorantýraǵa túsýge múmkindigi bar.
Bul baǵdarlama úshin shet tilin meńgergenin rastaıtyn sertıfıkattyń belgili bir deńgeıi talap etilmeıdi.
Sondaı-aq, beıini boıynsha doktorlar baǵdarlamasyna túsýshiler emtıhan barysynda esse jazbaıdy.
Eń joǵary kórsetkish — 80 ball, onyń ishinde áńgimelesýge — 25 ball, kásiporyndar men uıymdardyń usynys hatyna (bolǵan jaǵdaıda) — 5 ball jáne beıini boıynsha emtıhan suraqtary — 50 ball.
Shekti ball — keminde 50.
