Doktorantýraǵa túsýdiń qoldanystaǵy formaty ózgere me
ASTANA. KAZINFORM — Ǵylym jáne joǵary bilim mınıstrligi Májilis depýtattarynyń doktorantýraǵa túsýdiń qoldanystaǵy formatyn ózgertýge qatysty saýalyna jaýap berdi.
— Bıyl magıstratýra men doktorantýra júıesin jetildirý maqsatynda mınıstrlik joǵary oqý ornynan keıingi bilim berýdiń joǵary oqý ornynan keıingi bilim berýdiń memlekettik jalpyǵa mindetti standartyna ózgerister men tolyqtyrýlar engizdi. Osylaısha, magıstranttyń ǵylymı-zertteý jumysynyń nátıjelerin jáne doktorlyq dıssertatsııa taqyrybyn eskere otyryp, ǵylymı-zertteý jumystarynyń nátıjelerin jáne (nemese) alynǵan ǵylymı (eksperımenttik) nátıjelerdi eskere otyryp nemese dıssertatsııalyq zertteýdiń ǵylymı negizdemesin (research proposal) qaıta bekitýdi eskere otyryp, magıstrlik dıssertatsııa taqyrybyn túzetý kózdelgen, — dedi Ǵylym jáne joǵary bilim vıtse-mınıstri Dınara Şeglova jaýabynda.
Onyń atap ótýinshe, doktorantýranyń bilim berý baǵdarlamasynyń ǵylymı quramdas bóligi doktoranttyń ǵylymı-zertteý nemese eksperımenttik-zertteý jumysynan, ǵylymı jarııalanymdardan, doktorlyq dıssertatsııany jazýdan jáne qorǵaýdan qalyptasady. Dıssertatsııalyq zertteýdiń mazmuny ulttyq basymdyqtardy, irgeli nemese qoldanbaly zertteýlerdi júzege asyrýǵa baǵyttalǵan.
— Sonymen qatar doktorantýranyń bilim berý baǵdarlamalary doktoranttardyń ǵylymı jáne zertteý qyzmetine qajetti shet tilin meńgerýin qamtamasyz etedi. Joǵary oqý ornynan keıingi bilim berý sapasyn arttyrý boıynsha jumys jalǵastyrylatyn bolady. Osylaısha, mınıstrlik doktorantýraǵa túsýdiń qoldanystaǵy formatyn saqtaýdy oryndy dep sanaıdy jáne jas ǵalymdardy sapaly irikteý, ǵylymı súıemeldeý jáne qoldaý tetikterin damytý boıynsha jumysty jalǵastyrady, — dedi Dınara Şeglova.
Aıta ketelik Ǵylym jáne joǵary bilim mınıstrligi Májilis depýtattarynyń magıstratýraǵa túsý kezinde bakalavrıat beıinine qaraı shekteý engizýge qatysty saýalyna jaýap bergen edi.