Doktorantýraǵa túsý úshin qujattar qabyldaý bastaldy
Qujattar 2021 jyldyń 15 qarashasyna deıin qabyldanady.
Eske salaıyq, buǵan deıin Bilim jáne ǵylym mınıstri Ashat Aımaǵambetov magıstratýra men doktorantýraǵa oqýǵa túsý boıynsha ózgerister engizilgeni týraly jazǵan bolatyn. Endi qujattardy qabyldaý jylyna eki ret júrgiziledi. Konkýrsqa jazda grantqa túse almaǵan úmitkerler de, buryn-sońdy túsý emtıhanyn tapsyra almaǵandar da qatysa alady.
«Bıyl doktorantýraǵa túsý erejelerine ózgerister engizilgen bolatyn. Endi doktorantýraǵa qabyldaý «1 oqýǵa túsýshi - 1 kompıýter - 1 kamera» qaǵıdaty boıynsha óńirlik testileý ortalyqtarynda elektrondyq formatta ótetin túsý emtıhanynyń nátıjeleri boıynsha júzege asyrylady. Shara emtıhan tapsyrý kezinde ashyqtyqty jáne transparenttilikti qamtamasyz etýge baǵyttalǵan», - dedi mınıstrlikten.
Qabyldaý emtıhany: esse jazý, doktorantýrada oqýǵa daıyndyq testileýi jáne bilim berý baǵdarlamasy tobynyń beıini boıynsha kezeńderden turady.
Ekinshi túsý emtıhanyna qatysýǵa tirkelý QR BǴM Ulttyq testileý ortalyǵynyń app.testcenter.kz saıtynda júrgiziledi.
Qabyldaý emtıhany 2021 jyldyń 18 qarashasynan 11 jeltoqsanyna deıin ótedi. Aıta keteıik, memlekettik bilim berý tapsyrysy boıynsha jáne aqyly negizde oqýǵa túsý úshin ótý baly 75 baldy quraıdy. Doktorantýraǵa oqýǵa qabyldaý 2021 jylǵy 26 jeltoqsan men 10 qańtar aralyǵynda ótedi.
