Doktorantýraǵa túsý emtıhanyna ótinish qabyldaý bastaldy
ASTANA. KAZINFORM - Búgin, 3 shildede, doktorantýraǵa túsý emtıhanyna (DTE) qatysýǵa ótinish qabyldaý bastaldy. Ol 2025 jylǵy 3 tamyzyna deıin jalǵasady. Emtıhannyń ózi 4-20 tamyz aralyǵynda ótedi. Bul týraly Ǵylym jáne joǵary bilim mınıstrligi habarlady.
- Túsý emtıhanyna qatysýǵa tirkelý QR ǴJBM Ulttyq testileý ortalyǵynyń http://app.testcenter.kz/ saıtynda ótedi. Doktorantýraǵa túsý úshin tek bir joǵary oqý orny men bilim berý baǵdarlamalarynyń bir tobyn ǵana tańdaýǵa bolatyndyǵyn eskertemiz. Eger túsýshige berilgen ótinishke (testileýdi tapsyrý qalasy, bilim berý baǵdarlamalarynyń toby, testileýdi tapsyrý tili) ózgerister engizý qajet bolǵan jaǵdaıda, oǵan ótinishterdi qabyldaý júıesi jabylǵanǵa deıin (3 tamyzǵa deıin) ótinishti óńdeý nemese joıý múmkindigi beriledi, - delingen mınıstrlik habarlamasynda.
Testileýdi ótkizý orny men ýaqyty týraly aqparat túsýshiniń jeke kabınetinde 9 tamyzda qoljetimdi bolady. Túsý emtıhanyna áńgimelesý, esse jazý jáne bilim berý baǵdarlamasy tobynyń beıini boıynsha emtıhan kiredi.
Jalpy túsý emtıhanynyń eń joǵary kórsetkishi – 100 ball. Onyń ishinde áńgimelesý – 30 ball, esse – 20 ball, beıini boıynsha emtıhan suraqtary 50 ball. Al memlekettik bilim berý tapsyrysy boıynsha konkýrsqa qatysý úshin jáne aqyly negizde doktorantýraǵa túsý úshin shekti ball – 75.
Doktorantýraǵa túsý úshin QAZTEST júıesi boıynsha memlekettik tildi meńgergenin rastaıtyn sertıfıkat jáne shet tilin meńgergenin rastaıtyn sertıfıkat usyný qajet. TOEFL ITP sertıfıkaty bar tulǵalar DTE bastalǵanǵa deıin aǵylshyn tilin bilýge arnalǵan qosymsha testileýdi tapsyrady.
Atap ótsek, 2024 jyly shet tilin meńgergenin rastaıtyn sertıfıkattardyń shekti deńgeıleri B1-ge deıin tómendetildi jáne tizimge TOEIC jáne Duolingo English Test sertıfıkattary engizildi.
2024 jyldan bastap túsýshilerdiń beıinine qaraı doktorlar baǵdarlamasy boıynsha doktorantýraǵa túsýge múmkindikteri bar. Bul baǵdarlama úshin shet tilin meńgergenin rastaıtyn sertıfıkattyń belgili bir deńgeıi talap etilmeıdi. Sondaı-aq beıini boıynsha doktorlar baǵdarlamasy boıynsha túsýshiler emtıhan barysynda esse jazbaıdy.
Eń joǵary kórsetkish – 80 ball, onyń ishinde áńgimelesýge – 25 ball, kásiporyndar men uıymdardyń usynys hatyna (bolǵan jaǵdaıda) – 5 ball jáne beıini boıynsha emtıhan suraqtary – 50 ball. Shekti ball – keminde 50.
Aıta keteıik, Ǵylym jáne joǵary bilim mınıstrligi Májilis depýtattarynyń doktorantýraǵa túsýdiń qoldanystaǵy formatyn ózgertýge qatysty saýalyna jaýap berdi.