Doktorantýraǵa túsý emtıhany: ótinish qabyldaý 3 shildeden bastalady
ASTANA. KAZINFORM — 3 shildede doktorantýraǵa túsý emtıhanyna (DTE) qatysýǵa ótinish qabyldaý bastalady. Ol 2026 jyldyń 3 tamyzyna deıin jalǵasady. Emtıhannyń ózi 4-20 tamyz aralyǵynda ótedi, dep habarlaıdy Ǵylym jáne joǵary bilim mınıstrliginiń baspasóz qyzmeti.
Túsý emtıhanyna qatysýǵa tirkelý QR ǴJBM Ulttyq testileý ortalyǵynyń http://app.testcenter.kz saıtynda ótedi.
— Doktorantýraǵa túsý úshin tek bir joǵary oqý orny men bilim berý baǵdarlamalarynyń bir tobyn ǵana tańdaýǵa bolatyndyǵyn eskertemiz. Eger túsýshige berilgen ótinishke (testileýdi tapsyrý qalasy, bilim berý baǵdarlamalarynyń toby, testileýdi tapsyrý tili) ózgerister engizý qajet bolǵan jaǵdaıda, oǵan ótinishterdi qabyldaý júıesi jabylǵanǵa deıin (3 tamyzǵa deıin) ótinishti óńdeý nemese joıý múmkindigi beriledi. Testileýdi ótkizý orny men ýaqyty týraly aqparat túsýshiniń jeke kabınetinde 9 tamyzda qoljetimdi bolady, — delingen mınıstrlik habarlamasynda.
Túsý emtıhanyna áńgimelesý, esse jazý jáne bilim berý baǵdarlamasy tobynyń beıini boıynsha emtıhan kiredi. Jalpy, túsý emtıhanynyń eń joǵary kórsetkishi 100 ball, onyń ishinde áńgimelesý — 30 ball, esse — 20 ball, beıini boıynsha emtıhan suraqtary — 50 baldy quraıdy. Al memlekettik bilim berý tapsyrysy boıynsha konkýrsqa qatysý úshin jáne aqyly negizde doktorantýraǵa túsý úshin shekti ball 75 baldy quraıdy.
Doktorantýraǵa túsý úshin QAZTEST júıesi boıynsha memlekettik tildi meńgergenin rastaıtyn sertıfıkat jáne V1 deńgeıinen tómen emes shet tilin meńgergenin rastaıtyn sertıfıkat («Dene shynyqtyrý pedagogterin daıarlaý», «Mýzyka pedagogterin daıarlaý», «Qazaq tili men ádebıetiniń pedagogterin daıarlaý» jáne «Orys tili men ádebıetiniń pedagogterin daıarlaý» bilim berý baǵdarlamalarynyń toptaryn qospaǵanda) usyný qajet. TOEFL ITP sertıfıkaty bar tulǵalar DTE bastalǵanǵa deıin aǵylshyn tilin bilýge arnalǵan qosymsha testileýdi tapsyrady.
2026 jyldan bastap qujattar tizbesine ǵylymı zertteý jobasy (Research Proposal), sońǵy 3 kúntizbelik jyldaǵy ǵylymı jarııalanymdar tizimi (bar bolǵan jaǵdaıda), zertteýdi júrgizý jospary jáne esse engizilgen.
Sondaı-aq túsýshilerdiń beıini boıynsha doktorlar baǵdarlamasy boıynsha, onyń ishinde ındýstrııalyq PhD jáne DBA (Doctor of Business Administration) baǵdarlamalary boıynsha doktorantýraǵa túsýge múmkindikteri bar. Bul baǵdarlama úshin shet tilin meńgergenin rastaıtyn sertıfıkattyń belgili bir deńgeıi talap etilmeıdi.
Sondaı-aq beıini boıynsha doktorlar baǵdarlamasy boıynsha túsýshiler emtıhan barysynda esse jazbaıdy. Eń joǵary kórsetkish — 80 ball, onyń ishinde áńgimelesýge — 25 ball, beıini boıynsha emtıhan suraqtary — 50 ball jáne kásiporyndar men uıymdardyń usynys hatyna (bolǵan jaǵdaıda) — 5 baldy quraıdy. Shekti ball — keminde 50 ball.
Buǵan deıin doktoranttarǵa grant kóbeıip, jas ǵalymdarǵa qoldaý kúsheıgenin jazǵanbyz.
