Doktoranttarǵa grant kóbeıip, jas ǵalymdarǵa qoldaý kúsheıdi
ASTANA. KAZINFORM — Sońǵy jyldary Qazaqstanda ǵylymı kadrlardy daıarlaýdy, zertteýlerdi qarjylandyrýdy, halyqaralyq taǵylymdamalardy jáne áleýmettik máselelerdi sheshýdi qamtıtyn jas ǵalymdardy qoldaýdyń keshendi júıesi qalyptasty. Bul týraly Úkimettiń baspasóz qyzmeti málim etti.
Qabyldanyp jatqan sharalar jastardy ǵylymǵa tartýǵa, zertteýler júrgizý úshin jaǵdaı jasaýǵa jáne joǵary bilikti mamandardyń jańa býynyn qalyptastyrýǵa baǵyttalǵan.
— Ǵylymı kadrlardy daıarlaý úshin jyl saıyn joǵary oqý ornynan keıingi bilim alý múmkindikteri keńeıtilýde. 2025-2026 oqý jylyna doktoranttardy daıarlaýǵa 2919 bilim berý granty bólindi. Indýstrııalyq PhD tetigi boıynsha ekonomıkanyń basym baǵyttary boıynsha mamandar daıarlaý úshin qosymsha 110 grant kózdelgen, — delingen habarlamada.
«Jas ǵalym» granttyq qarjylandyrý baǵdarlamasy jalǵasady, onyń sheńberinde jyl saıyn jas zertteýshilerdiń ǵylymı jobalaryn júzege asyrýǵa myń grant bólinedi. Zańnamalyq deńgeıde perspektıvaly zertteýshilerdi qoldaýǵa jáne ǵylymdy jastar arasynda nasıhattaýǵa baǵyttalǵan jyl saıynǵy «Úzdik jas ǵalym» syılyǵy bekitildi.
— Halyqaralyq yntymaqtastyq pen ǵalymdardyń biliktiligin arttyrýǵa erekshe kóńil bólinýde. 2021 jyldan beri álemniń jetekshi ýnıversıtetteri men ǵylymı ortalyqtarynda oqý men taǵylymdamadan ótýge múmkindik beretin «250 ǵylymı taǵylymdama» baǵdarlamasy júzege asyrylýda. 2021-2025 jyldar aralyǵynda sheteldik ǵylymı taǵylymdamalarǵa 1543 qazaqstandyq ǵalym jiberildi. Baǵdarlamaǵa qatysýshylardyń 62%-dan astamyn jas zertteýshiler quraıdy, — dep habarlady Úkimetten.
Sonymen qatar ǵylymı qoǵamdastyqty áleýmettik qoldaý sharalary da kúsheıtilýde. 2023 jylǵy 1 qyrkúıekten beri bir doktorantty daıarlaýdy qarjylandyrý kólemi orta eseppen 17%-ǵa ulǵaıdy, bul zertteýler júrgizý jáne ǵylymı kadrlar daıarlaý úshin múmkindikterdi keńeıtýge jol ashady.
Turǵyn úı máselesine erekshe kóńil bólinip otyr. Búgingi tańda 722 jas ǵalym baspanamen qamtamasyz etildi. Onyń ishinde 584 adam Ǵylym jáne joǵary bilim mınıstrligi men «Otbasy bank» AQ-nyń birlesken baǵdarlamasynyń arqasynda baspana satyp alýǵa múmkindik aldy, taǵy 138 jas ǵalym óteýsiz negizde páter aldy.
Júzege asyrylyp jatqan sharalar kesheni zamanaýı ǵylymı ortany qalyptastyrýǵa, jastardyń zertteý áleýetin damytýǵa, ǵylymnyń kadrlyq áleýetin nyǵaıtýǵa jáne Qazaqstannyń jahandyq ǵylymı-tehnologııalyq keńistiktegi básekege qabilettiligin arttyrýǵa baǵyttalǵan.
Aıta ketenıik, qazaqstandyq ǵalymdar jýsan tozańyna qarsy allergııaǵa arnalǵan preparatty zerttep jatyr.
