«Doktor Haýs» serıalynyń arqasynda adam ómiri qutqaryldy
ASTANA. QazAqparat - Dárigerler «Doktor Haýs» serıalyndaǵy oqıǵanyń jelisi boıynsha naýqasty emdep, tipti onyń ómirin qutqardy, dep habarlaıdy EuroNews.
2010 jyly nemis azamatynyń jambas býynynyń keramıkalyq endoprotezin jańadan jasalǵan temir protezge aýystyrǵan. Kóp ýaqyt ótpeı álgi naýqastyń densaýlyǵy syr bere bastady. Estý jáne kórý qabileti nasharlap, júrek qan tamyr júıesi jumysynda aqaý paıda bolǵan. Bir jyldam astam ýaqyt boıy aq halattylar aýrýdyń sebebin anyqtaı almaǵandyqtan, naýqas kómek surap Marbýrg ýnıversıteti klınıkasynyń mamandaryna barǵan.
Naýqasty tekserý kezinde dárigerler ondaǵy aýrýdyń «Doktor Haýs» serıalyndaǵy oqıǵaǵa uqsastyǵyn baıqaǵan. Serıalda dáriger Gregorı Haýs (Hıý Lorı) naýqas adamǵa jambas býynynyń temir endoproteziniń saldarynan kobaltpen ýlandy degen dıagnoz qoıady. Marbýrgtyq mamandar osy dıagnozdy qoıyp, temir protezdi keramıkalyq protezge aýystyrǵan soń, onyń júreginiń jumysy qalpyna kelgen. Tipti, bir jyldam astam ýaqyt boıy mazalaǵan basqa aýrýlar da ózdiginen seıilgen.
Eske sala ketsek, «Doktor Haýs» - Gregorı Haýs bastaǵan túrli medıtsınalyq jaǵdaıdy bastan ótkizip, san túrli qıyn máselelerdi der kezinde sheshe biletin dárigerlik top týraly týyndy. Serıaldyń stsenarııin jazýǵa ondaǵan dáriger-keńesshi mamandar shaqyryldy. Oqıǵa jelisiniń senimdi bolýyna ómirde bolǵan naqty jaǵdaılar áser etken.
