Doing Business reıtınginde Qazaqstan Japonııadan keıin tur

ASTANA. QazAqparat - Dúnıejúzilik bank «Doing Business» reıtıngisin jarııalady. Onda «Elektrmen jabdyqtaý júıesine qosylý» ındıkatory boıynsha Qazaqstan birden 27 satyǵa kóterildi jáne TMD-da eń úzdikterdiń biri boldy, dep habarlaıdy QR Energetıka mınıstrliginiń baspasóz qyzmeti.

Dúnıejúzilik banktiń Doing Business - 2017 reıtıngisinde Qazaqstan ótken jylǵy 41-shi orynnan kóterilip, álemniń 190 eliniń arasynan 35-shi oryn aldy. Bul týraly aqparat Dúnıejúzilik banktiń resmı saıtynda ornalastyryldy. Budan basqa, Qazaqstan sany eń kóp reformalardy júzege asyrǵan elderdiń qataryna endi.

Dúnıejúzilik Banktiń baıandamasynda elderdiń reıtıngi ulttyq kompanııalar úshin kásipkerlik qyzmetti normatıvtik quqyqtyq retteýdiń mańyzdy aspektisi boıynsha júrgiziledi. Doing Business elder reıtıngisin qalyptastyrýda negizge 10 ındıkator  alynǵan.

Indıkatorlarynyń biri «Elektrmen jabdyqtaý júıesine qosylý» bolyp tabylady, osy ındıkator boıynsha Qazaqstan ótken jylǵy 102-shi orynnan osy jyly reıtıngte 75-shi orynǵa sekiris jasady, ıaǵnı birden 27 satyǵa kóterildi. Osy kórsetkish boıynsha elimiz  Ázerbaıjan - 105-shi oryn, Qyrǵyzstan - 163-shi oryn, Ýkraına - 130-shy oryn sııaqty TMD elderin basyp ozdy. Reseı men Belarýs bul reıtıngte tıisinshe 30-shy jáne 24-shi oryn aldy.

Baıandamada 2015 jylǵy 2 maýsymnan bastap 2016 jylǵy 1 maýsymǵa deıingi kezeńde júrgizilgen reformalar esepke alynǵan. Osy ýaqyt aralyǵynda elektrmen jabdyqtaý júıesine qosylý boıynsha Qazaqstandyq bıznes úshin jaǵdaıdy jaqsartatyn mańyzdy reformalardy júzege asyrdy.

Osy kezeńde Qazaqstannyń zańdaryna birqatar ózgerister men tolyqtyrýlar kúshine endi. Atap aıtqanda, belgilengen qýaty 200 kVt deıingi elektr qondyrǵylary bar tutynýshylar úshin elektrmen jabdyqtaý jelilerine qosylý úshin tehnıkalyq sharttardy berý merzimi 14 kúnnen 5 kúnge deıin qysqartyldy. Energııa berýshi uıymdarmen tutynýshylardyń jobalyq sheshimderin kelisý merzimi 20 kúnnen 3 kúnge deıin azaıtyldy. Qurylys-montaj jumystaryna ruqsat alý qajettigi alynyp tastaldy. Endi jobalaýshyǵa memlekettik sáýlet qurylys baqylaý basqarmasyna jumystyń bastalýy týraly habarlamany elektrondyq túrde jiberý jetkilikti.

Budan basqa, memlekettik energetıkalyq qadaǵalaý jáne baqylaý organynan elektr jelilerine qosylýǵa ruqsat alýdyń qajettiligi joıyldy.  Elektrmen jabdyqtaýshy uıymmen elektr jabdyqtaýǵa shart jasasýdyń bir aptalyq merzimi úsh kúnge deıin qysqartyldy.

Elektrmen jabdyqtaýdyń senimdilik kórsetkishiniń bekitilgen mánin saqtamaǵany úshin  energııa berýshi uıymdardyń basshylaryna ákimshilik aıyppuldy engizý de taǵy bir jańalyq boldy.

Doing Business halyqaralyq reıtıngisinde Qazaqstan Reseı, Belgııa, Italııa, Grekııa jáne Lıýksembýrg sııaqty memleketterdiń aldyna shyǵyp, Japonııa men Rýmynııanyń arasyna ornalasty. Jańa Zelandııa osy jyly bıznesti júrgizý úshin eń qolaıly sharttary bar el boldy, ekinshi oryndy Sıngapýr aldy, Danııa úshinshi oryndy saqtap qaldy.