Doing Business reıtınginde 20 úzdik eldiń qataryna kirý úshin ne istelip jatyr

NUR-SULTAN. QazAqparat – Ulttyq ekonomıka mınıstri Áset Erǵalıev Qazaqstandy Doing Business reıtınginde 20 úzdik eldiń qataryna engizý úshin tıisti zań jobasy ázirlenip jatqanyn málim etti, dep habarlaıdy QazAqparat tilshisi.

«Bıznesti ashý jáne júrgizý úshin ári qaraı jaǵdaıdy jaqsartý maqsatynda Doing Business reıtınginde 20 úzdik eldiń qataryna kirý úshin birqatar is sharalar ázirlenýde. Osy maqsattardy iske asyrý úshin tıisti zań jobasy ázirlenýde. Zań jobasy bıznes qyzmetiniń túrli salalaryndaǵy 23 mańyzdy reformany qamtıtyn bolady», - dedi ol.

Mınıstr kásipkerlerdi qoldaý úshin Ulttyq kásipkerler palatasymen, bıznes-ombýdsmenmen, bıznes qaýymdastyqtarymen ózara belsendi túrde jumys júrgizilip jatqanyn atady.

«Bul jumys Úkimet janyndaǵy Kásipkerlik máseleleri jónindegi jobalyq ofıs aıasynda júzege asyrylady. Ulttyq ekonomıka mınıstrligi Shaǵyn jáne orta bıznes jaǵdaıyn belsendi monıtorıngin jalǵastyratyn bolady», - Áset Erǵalıev.